Атырдьах ыйын 19-24 күннэригэр Сунтаар оройуонугар «Ыччат десана» үлэлиэҕэ. Акция Россия президенэ Владимир Путин көҕүлээбит «Ыччакка анаммыт регион» национальнай бырайыак «Ыччат уонна оҕолор» бырагырааматын чэрчитинэн “Росмолодежь” өйөбүллэринэн тэрилиннэ.
«”Биһиги туспутугар!” ыччат десана өрөспүүбүлүкэ оройуоннарыгар тахсар. Нэһилиэнньэлээх пууннарга анал байыаннай дьайыы кыттыылаахтарын дьиэ кэргэттэригэр, тыыл бэтэрээннэригэр, кыһалҕалаах дьоҥҥо көмөнү оҥоробут, бөһүөлэктэри тупсарыыга кыттабыт. Ону таһынан үөрэх кэмигэр үрдүкү кылаас үөрэнээччилэрин кытта профориентационнай көрсүһүүлэри ыытабыт», – диэн кэпсээтэ «Патриот» киин ыччат уопсастыбаннай тэрилтэлэрин сүрүннээччитэ Алгыстаан Софронов.
Быйыл эрдэ “Ыччат десана» баҕа өттүнэн Үөһээ Бүлүү, Горнай, Бүлүү, Ньурба, Хаҥалас оройуоннарыгар сырытта. Сырыы кэмигэр 500-тэн тахса киһиэхэ көмөлөстүлэр. Бөһүөлэктэри тупсарыыга, хомуйууга, өрөмүөннээһиҥҥэ, күрүө туруорууга уонна оҕуруот сирин хорутууга үлэлэри толордулар.
“Ыччат десана” от ыйыгар Охотскай перевоз сэлиэнньэтигэр таҕыста. Манна “Полет стерха” норуоттар икки ардыларынааҕы орнитологическай обсерватория аһыллыахтаах. Ол туһунан Саха сирин баһылыга Айсен Николаев Илиҥҥи экономическай форумҥа биллэрбитэ. Десант кыттыылаахтара саҥа эбийиэктэр тутуллар миэстэлэрин бэлэмнииргэ көмөлөспүттэр: эргэ дьиэлэри, сарайдары, хотоннору, олбуор тутууларын, күрүөлэри көтүрэн, бөҕү-сыыһы хомуйан таһаардылар.
