Билигин баһаарга бэлэмнэнии үлэтэ түмүктэнэр. Экология министиэристибэтигэр эппиттэринэн, 25 лесничествоҕа анаан, ойуур баһаара тахсар түбэлтэтигэр былааны оҥордулар уонна бигэргэттилэр. Суһаллык үлэҕэ ылсарга 5676 киһи уонна 1779 техника бэлэм.
Авиация уонна сатыы патруллааһын маршруттара бигэргэннилэр. 20 оройуоҥҥа 32 кэтээн көрөр камера туруорулунна, тэриллэр баһаар балаһыанньатын мониторинныахтара.
Авиапатрулирование олохтонуоҕа, 29 сөмөлүөт уонна икки бөртөлүөт. Баһаары умуруорууга 20 бөртөлүөт уонна Ан-24/26 сөмөлүөт үлэлиэҕэ.
Региоҥҥа биэс саҥа авиаотделение тэриллэр, иккитэ быйыл үлэтин саҕалыыр. Авиалесоохрана састаабыгар 181 исписэлиис ылылынна.
Ойууру баһаартан харыстааһыҥҥа федеральнайдааҕы бюджеттан 2025 сылга 4,3 млрд солк көрүлүннэ.
