13 От ыйа 13.07
  • 17°
  • $ 87,74
  • 95,76

Ыһыахтар күрэхтэһиилэрэ: Ким ханна кыайда? (ИСПИИҺЭК)

11:25, 05 июля 2018
Текст:
Читайте нас на
Яндекс Новости
ЯДВ

Кэнники сылларга ыһыахха саха многоборьетыгар күрэхтэһиилэри ыытар муода буолла. Ол эрэн, дьон-сэргэ “Дыгын оонньууларын”, “Тоҕус Томтор”, “Эр Бэрдэ” курдук улахан күрэхтэһиилэр кыайыы­лаахтарын эрэ билэр. Элбэх орто күрэхтэһиини кыайбыт боотур үчүгэйдик сырдатыллыбакка хаалар. Ол иһин, араас ыһыахтар кыайыылаахтарын кыратык сырдатарга сананным.


Сахаачча оонньууларын Сдвижков кыайда

Сахаачча оонньуулара сыл аайы Амма улууһугар ыытыллар. Бу күрэхтэһиилэргэ урут Владимир Никитин, Павел Чемезов, Леонид Филиппов курдук биллэр спортсменнар кыайа сылдьыбыттара. Быйыл Сахаачча бирииһин “Дыгын оонньууларын” кыттыылааҕа Борис Сдвижков ылбыта, 100 тыһыынча солкуобайынан наҕараадаламмыта. Бэйэтэ этэринэн, Сахаачча оон­ньууларыгар “Дыгын оонньууларыгар” иннинэ этин-хаанын арыйа таарыйа кыттыбыт.

Борис Сдвижков «Сахаачча бирииһин» кыайыылааҕа

Бүлүү Боотура — Николай Николаев

Сыл аайы “УАЗ” массыына бириистээх “Бүлүү Боотура” күрэхтэһии ыытыллара үгэс буолла. Күрэхтэһиигэ Бүлүү эрэ боотурдара киирсэллэр диэтэххэ, барыта ааттаах-суоллаах боотурдар киирсээччилэр. “Бүлүү Боотура” аатын сүгэргэ хара күүстээх эрэ буолбакка, быһый, сымса буолуохха наада. Быйылгы тыҥааһыннаах киирсиигэ өрөспүүбүлүкэ биир күүстээх хапсаҕайдьыта Николай Николаев муҥутуур кыайыылааҕынан тахсыбыта уонна “УАЗ” массыына хаһаайынынан буолбута.

Николай Николаев «УАЗ» массыына хаһаайынынан буолла

“Эҥсиэли Боотуругар” быйыл хамаанданан киирсии буолла

Элбэх многоборецтары иитэн таһаарбыт “Эҥсиэли Боотура” күрэхтэһиигэ быйыл нэһилиэктэр хамаандаларынан киирсии буолла. Урут бу күрэхтэһиигэ Николай Дьяконов, Алексей Кутуков, Артем Варданян, Антон Тойтонов кыайа сылдьыбыт буоллахтарына, быйыл Ленскэй нэһилиэгин хамаандата муҥутуур кыайыылаах буолла. Күрэхтэһии быраабылатынан, хамаандаҕа биэс киһи баар. Хас биирдии киһи биирдии көрүҥҥэ киирсибитэ. Ол курдук, үс төгүл үс, мас тардыһыыта, хапсаҕай, тутум эргиир, өһөс торбос көрүҥнэргэ. Күрэхтэһиини түмүктүүргэ хамаанданан эстафетаҕа бары 200-түү миэтэрэҕэ сүүрэллэр. Уопсай түмүккэ, Ленскэй нэһилиэк хамаандата барыларын сабырыйан, кыайыы­лааҕынан таҕыста уонна убаһанан наҕараадаланна. Маны таһынан, кыра нэһилиэктэр очукуолара туспа ааҕыллар буолан, 2-ис Хомустаах нэһилиэгин хамаандата бастаан, 20 тыһ. солкуобайынан наҕараадаланна.

II-ис Хомустаах нэһилиэгин спортсменнара хамаанданан многоборьеҕа чөмпүйүөннэр

Владимир Федоров Ньурба ыһыаҕар кыайда

“Дыгын оонньууларыгар” мас тардыһыытыгар уонна хапсаҕайга иннин биэрбэтэх Владимир Федоров “Дыгын оонньууларынан” эрэ муҥурдаммата. Кини Туймаада ыһыаҕын сарсыныгар, дойдутугар Ньурбаҕа тиийэн күрэхтэһэн бас­таабытыттан киһи өссө үөрэр.

Владимир Федоров «Дыгын оонньууларыгар» кыттаат, Ньурба ыһыаҕар тиийэн чөмпүйүөннээтэ

Николай ПОПОВ, «Саха сирэ» хаһыат, edersaas.ru, СИА.

Следите за самым важным и интересным в Telegram-канале и WhatsApp-группе ЯСИА