2019 сыл сэтинньи 5 күнүгэр Госдума бастакы ааҕыыга вытрезвителлэри төннөрөр сокуон барылын ылыммыта. Билигин РФ бырабыыталыстыбата тэрилтэлэри тэрийии быраабылаларын чочуйар. Сокуон барыла бу сылга ылыллан, эһиил тохсунньу 1 күнүттэн олоххо киирэрэ былааннанар. Бу туһунан ТАСС суруйар.
Итирдэри аһардар тэрилтэлэри судаарыстыба-чааһынай биисинэс кыттыгас тэрийэллэрэ былааннанар. Анал дьиэҕэ хонуу иһин ороскуот төлөбүрүн киһи бэйэтэ төлүүрэ сабаҕаланар.
Вытрезвителгэ биир түүҥҥэ хонуу ортотунан 1,5 тыһ солкуобай буолуо. Чуолкай сыананы хас биирдии эрэгийиэн бэйэтэ быһыа.
Санатар буоллахха, Арассыыйаҕа вытрезвителлэр 2011 сыллаахха суох буолбуттара. Быраабы харыстыыр уорганнар дааннайдарынан итирбити аһардар санитарнай тэрилтэлэр эстиилэрэ холуобунай буруй элбээһинигэр тиэрдибит. Маны аҕыйатар сыалтан биирдиилээн эрэгийиэннэргэ вытрезвителлэри тэрийээһин саҕаламмыт.
This post was published on 19.11.2020 13:01 13:01