Ытык Күөл сэлиэнньэтигэр Саха сирин эр дьоҥҥо волейболга чемпионата (үрдүкү лига) түмүктэннэ. Күрэхтэһии түмүгүнэн 2027 сылга Ньурба улууһугар ыытыллар өрөспүүбүлүкэ норуоттарын IX спортивнай оонньууларын финальнай чааһыгар путевкалар хаһаайыннара билиннилэр, диэн ЯСИА иһитиннэрэр.
Чемпионат кулун тутар 4-8 күннэригэр ыытылынна, Дьокуускай, Мэҥэ Хаҥалас, Таатта, Амма, Өлүөхүмэ, Ленскэй, Нам уонна Мииринэй оройуоннарыттан хамаандалар кытыннылар.
Хамаандалар бөлөх түһүмэҕин уонна плей-офф матчтарын оонньоотулар. Финалга кыһыл көмүс мэтээл иһин Таатта уонна Өлүөхүмэ улуустарын сүүмэрдэммит хамаандалара көрүстүлэр. Быһаарыылаах хапсыһыыга кыайыыны Таатта улууһун хамаандата ылла. Спортивнай комплекс трибуналарын толорбут ыалдьааччылар хаһаайыттарга улахан өйөбүлү оҥордулар.
Чемпионат түмүгүнэн Саха сирин норуоттарын IX Спортивнай оонньууларын финальнай чааһыгар киирсэр хамаандалар быһаарылыннылар. Путевкалары Таатта, Өлүөхүмэ, Нам, Мэҥэ Хаҥалас уонна Амма улуустарын сүүмэрдэммит хамаандалара, ону таһынан Дьокуускай хамаандата ыллылар.
Саха сирин баһылыга Айсен Николаев дьаһалынан, өрөспүүбүлүкэ норуоттарын IX спортивнай оонньуулара 2027 сыл от ыйын 7 күнүттэн от ыйын 11 күнүгэр диэри Ньурба оройуонугар ыытыллыахтара.
