Билигин үгүс дьон Өлүөнэ эбэни туоруур күргэ хаһан тутулларын эрэнэ-долгуйа күүтэллэр. СӨ Тырааныспарга уонна суол хаһаайыстыбатыгар миниистирэ Владимир Сивцев этэринэн, 2024 с. гырааны 1,7 млрд. солк. диэри улаатыннарбыттар, кэлэр сылга 5 млрд. солк. көрүллүөхтээх, оттон тутууну ыытарга 9 млрд. солк. наада. Сбербаан федеральнай хааһынаттан үп көрүллүбэт түгэнигэр кирэдьиит биэрэртэн туттунар эбит.
Дойду бэрисидьиэнэ Владимир Путин Дьокуускайга кэлэ сылдьан, үбүлээһин харгыһа суох, өссө урутаан барыахтааҕын туһунан сыал-сорук туруорбут. Кини Өлүөнэ эбэни туоруур күргэ 2028 с. бүтүөр диэри бэлэм буолуохтааҕын сорудахтаабыт. Онон 5 млрд. солк. федеральнай киинтэн быйыл кэлэрэ күүтүллэр.
300 мөл. солк. эрэгийиэннээҕи гыраан харчыта от ыйыгар тутууну саҕалыырга төлөнүөхтээх. Быйыл өрүс кытылыгар тутуу үлэтэ бүтэн-оһон, эһиил ууга тахсан, тирэхтэри бэлэмниэхтээхтэр. Владимир Сивцев РФ Киин Баана сүрүн ыстаапканы үрдэтэн, улахан сууманы кирэдьиит ылар табыгаһа суоҕун бэлиэтээтэ.
