Сарсын М.Е. Николаев аатынан 40 №-дээх орто оскуола 1а кылааһын үөрэнээччитэ Вераника Лиханова «Семья — инвестиции в будущее» диэн 2-с өрөспүүбүлүкэтээҕи үп билиитин бэстибээлигэр кыттар. Кини настаабыньыга — ийэтэ Вера Лиханова.
Муус устар 3 күнүгэр И.И. Фадеев аатынан үп-экэниэмикэ кэллиэһин былаһааккатыгар М.Е. Николаев аатынан 40 №-дээх орто оскуола 1а кылааһын үөрэнээччилэрэ Вераника Лиханова, Ильдар Попов, Сайаана Аргунова, Айсан Васильев урбаан эйгэтигэр бастакы холонууларын биһирэмниэхтэрэ. Кылаастарын салайааччыта Любовь Саввина «оҕо — төрөппүт — оскуола» диэн хайысханан үөрэнээччилэригэр иитэр үлэни ыытар.
Бу күн оҕолор бэйэлэрэ төрөппүттэрин кытта оҥорон таһаарбыт бородууксуйаларын көрдөрүүгэ туруоран, атыыга таһаарыахтара.
Вераника Лиханова пастилаттан уонна сублимированнай отонтон минньигэс оҕуруону тиһэн көрдөрүөҕэ. «Барыта бэйэбит айылҕабытыттан, Саха сирин отоно, саахара, араас минньитэр эбиилигэ суох, бэлэххэ олус табыгастаах, оҕолор сиирбитин сөбүлүүбүт. Мин бу минньигэс аспар логотибын уруһуйдаан оҥордум», — диэн санаатын үллэстэр. Кыысчаан бу күн «Амтанынан ханнык отон буоларын таай» диэн оонньуу ыытарга бэлэмнэнэр.
Настаабынньыга — ийэтэ, «Ферма Лиханова» хаһаайката, Саха сиригэр пастиланы, сублимированнай бородууксуйаны оҥорон таһаарааччы Вера Лиханова буолар. Санатар эбит буоллахха, кини «Народный органический бренд» диэн органика куонкурсугар кыттар. «Наһаа эппиэтинэстээх. Элбэх үлэ, төрөөбүт дойдуга таптал, хаачыстыба иһин туруулаһыы», — диир предприниматель Лиханова. Лихановтар пиэрмэлэригэр оҥоһуллан тахсар бородууксуйаны элбэх киһи сөбүлээн ылар. Куоластааһын сигэтэ: https://roskachestvo.gov.ru/about/competence/organic/contest/vote/#voteForm
