Муус устар 4, 5 күннэригэр Уус Алдан улууһун кэккэ предметтэри дириҥэтэн үөрэтэр Лөгөй орто оскуолатын базатыгар «Молодой педагог Заречья» диэн ааттаах эдэр учууталлар күрэхтэрэ буола турар, диэн СИА улуус дьаһалтатын телеграм-ханаалыгар сигэнэн кэпсиир.
Күрэххэ 6 улуустан 13 учуутал кэлэн кытта сылдьар. Күрэҕи ИРОиПК экспертэрэ, ону таһынан улуустартан биирдии бэрэстэбиитэл сыаналыы сылдьаллар. Уопсайа 13 кыттааччы 19 эксперт иннигэр бэйэлэрин билиилэрин, сатабылларын, методическай таһымнарын көрдөрөн, араас предметнэй хайысхаларынан кыайыылаахтар тахсыахтаахтар. Уопсайа 4 цикл үлэлии турар.
Бастакы күҥҥэ семинардары, аһаҕас уруоктары көрдөрдүлэр, анал бырайыактарын көмүскээтилэр. Иккис күҥҥэ маастар кылаастар, төгүрүк остуоллар уонна педсоветтар ыытыллыахтара. Бу улахан тэрээһин эдэр учууталларга бастакы үктэл, төһүү күүс, улахан уопут ылыныыта буолара саарбаҕа суох. Манна хас биирдии кыттааччы элбэҕи билэр-көрөр, үүнэр сайдар.
Маны сэргэ, бу күрэх Илин Эҥэр оскуолаларын үлэлэрин уопута тарҕанарыгар көмөлөһөр.2022 сыллаах күрэх кыайыылааҕынан Лөгөй оскуолатын историяҕа уонна обществознаниеҕа учуутала Василий Васильевич Бережнев буолбута. Кыайыылаах учуутал оскуолатыгар тэрээһин ыытыллара үтүө үгэскэ кубулуйда. Бу маннык күрэхтэргэ биирдиилээн кыттааччы эрэ буолбакка, бүтүн хамаанда үлэтэ эмиэ көстөр. Бу күрэххэ кыайыылаах аатын сүкпүт учуутал «Сыл бастыҥ учуутала» өрөспүүбүлүкэтээҕи күрэххэ кыттар быраабы ылыаҕа.
Ааптар: Айгыына Бурнашева, Лөгөй орто оскуолатын 10 кылааһын үөрэнээччитэ
