Саха АССР 100 сыллаах үбүлүөйүгэр аналлаах бастакы улахан тутууну Уус-Алдан улууһун Суоттутугар үлэҕэ киллэрдилэр. 220 миэстэлээх аныгылыы оскуола үөрүүлээх арыллыыта буолан ааста. Оскуаланы «Үөрэхтээһин» национальнай бырайыак чэрчитинэн туттулар, диэн СИА кэпсиир.
Саҥа икки этээстээх оскуолаҕа хаачыстыбалаах үөрэҕи хааччыйарга бары усулуобуйа баар: киэҥ- куоҥ спортивнай уонна актовай саалалар, мастарыскыайдар, «Точка роста» киинэ, тыыннаах муннук, ону сэргэ тутуу толору хааччылыылаах. Саҥа оскуола 1975 сылтан үлэлээбит аварийнай туруктаах диэн биллэриллибит эргэ оскуоланы солбуйда . Тутууну ООО «Русстрой- 89» оҥордо.
Оскуола үөрүүлээх арыллыытыгар Саха сирин бырабыыталыстыбатын бэрэссэдээтилин солбуйааччы Сергей Местников, судаарыстыбыннай мунньах (Ил Түмэн) бастакы солбуйааччы Александр Жирков, Ил Түмэн наукаҕа, үөрэххэ, маассабай информацияҕа бастайааннай кэмитиэтин бэрэссэдээтэлэ Феодосия Габышева, үөрэх уонна наука министирин солбуйааччы Владимир Тихонов, Уус- Алдан улууһун баһылыга Алексей Федотов, Суотту нэһилиэгин баһылыга Василий Иванов кытыннылар.
Мария Васильева түһэриитэ
