Арассыыйа норуоттарын култууратын үйэлээх баайын уонна Саха АССР 100 сылларыгар аналлаах СӨ уус-уран оҥоһуктарын маастара, үлэ бэтэрээнэ, улахан дьиэ кэргэн күн күбэй ийэтэ, эбэтэ, эдэр сааһыттан сопхуоска таһаарыылаахтык үлэлээбит “Эдэр гвардеец», «Көмүс колос», улуус, нэһилиэк «Социальнай-экэнэмиичэскэй сайдыытыгар кылаатын иһин» бэлиэлэр хайааһыннара Харитина Гоголева кэргэнин Александр Михайловичтыын кымыс иһиитин сиэригэр-туомугар туттуллар тирииттэн СИРИ уонна СИМИИР иһиттэри оҥорон, дьоҥҥо билиһиннэрэр, сүрэхтиир дьоро күннэрэ буолла. Маастар Харитина Ивановна иһиттэр суолталарын уонна уустук ыарахан үлэлэрин хаамыытын билиһиннэрдэ. Бу дьоһун, үйэлээх оҥоһук Суорун Омоллоон аатынан Өлүөнэтээҕи «Доҕордоһуу» мусуой пуондатыгар барыаҕа.
Харитина Ивановна бэйэтин дьоҕурун Дьокуускай куорат Үһүс саас оскуолатыгар сайыннарбыта. Онтон бочуоттаах сынньалаҥҥа үөлээннээхтэрин «Симэхтэр» түмсүүлэрин 2014 сылтан салайан, хас биирдии кэрэ аҥаар дьоҕурун таба көрөн, дьарыктарга уһуйан барбыта.
Айымньылаах, хотуулаах үлэлэринэн далбар хотуттар улууска, өрөспүүбүлүкэҕэ, Арассыыйаҕа норуоттар икки ардыларынааҕы быыстапкаларга ситиһиилээхтик кыттан, Харитина Гоголева, Маргарита Пестерева, Мария Федорова, Ирина Дьяконова, Альбина Сивцева, Александра Парникова улуус норуотун маастара буолбуттара. Харитина Гоголева, Маргарита Пестерева СӨ уус-уран оҥоһуктарын маастара үрдүк ааты ылбыттара.
Араас хайысхалаах куруһуоктарга дьарыктанан, кылтан, сиэлтэн, кыбытык тигиинэн, валяниенан саха омук үгэстэрин үйэтитэр дьикти кэрэ оҥоһуктара дьон биһирэбилин ылаллар. Таһымнарын үрдэтэр маастар-кылаастарга дьарыктаналлар, куруһуок салайааччылара саҥа саҕалааччыларга көмөлөһөллөр, маастар-кылаастары ыыталлар, бэйэ-бэйэлэрин ситэрсэн биэрэллэр.
Оҕо саадын, оскуола оҕолоругар «Эбэ үөрэҕэ» диэн дьарыгы ыыталлар. Доруобуйаны чэбдигирдэргэ хаалыктаах хаамыынан дьарыктаначчы үгүс. «Дьүөгэ» (сал. С.Д. Аргунова) ырыа ансаамбыла улууска икки төгүл Гран-При анал ааты ылбыта. Түмсүү дьахталлара нэһилиэккэ, улууска ыытыллар тэрээһиннэргэ көхтөөхтүк кытталлар. Бу барыта түмсүү салайааччытын дьону кытта үлэлиир сатабылын туоһута.
Саха омук ыһыаҕын сиэригэр-туомугар туттуллар иһит дириҥ өйтөн-санааттан, толкуйтан, бэйэ кыаҕар эрэнииттэн саҕаланнаҕа. Дьоҕурдаах, дьаныардаах Харитина, Александр Гоголевтар дьиэ кэргэттэрин дьоһун үйэлээх оҥоһуктарынан биир дойдулаахтара киэн туттабыт, айар талааннара чэчирии сайдарыгар эрэнэбит.
Светлана Петрова, уопсас. кэрэсп. Найахы
Мүрү Саһарҕата
