25 От ыйа 25.07
  • 22°
  • $ 86,55
  • 94,38

Уус Алдаҥҥа психологическай киин анал байыаннай дьайыыга көмөнү көҕүлүүр

Читайте нас на
Яндекс Новости
ЯДВ

Психологическай киин Уус Алданнааҕы салаатын үлэһиттэрэ анал байыаннай дьайыы саҕаланыаҕыттан быстах хомуурга хабыллан уонна хантараагынан барааччылары, кинилэр дьиэ кэргэннэрин кытта кэпсэтэн уйулҕа хамсааһынын намыратар сыаллаах үлэлэрин саҕалаабыттара. Ону таһынан, хорсун байыастарбытыгар күүс-көмө оҥорор араас аахсыйаларга көхтөөхтүк кытталлар.

Бу күннэргэ анал байыаннай дьайыыга анаммыт «Сылаас кыһын» өрөспүүбүлүкэтээҕи аахсыйаҕа кыттыстылар. Бу туһунан киин салайааччыта Саргылаана Никитина маннык кэпсээтэ:

– Бу аахсыйаҕа улууспут дьоно кытталларын көҕүлээн нэһилиэнньэ актыыбынай дьахталларыгар ыҥырыы таһаарбыппыт. Ыҥырыыбытын ылынан үтүө санаалаах далбар хотуттарбыт кэлэн киэп быһыытыгар, таҥас тигиитигэр кытта сылдьаллар. Бу тигиллибит аптечкалары, ичигэс таҥастары манна уоппускаҕа кэлэ сылдьар уолаттарбытыгар биэрэн ыытыахпыт, сороҕун “Якутия с тобой» уопсастыбаннай тэриллиигэ киллэрэн туттарыахпыт.

Бу аахсыйаҕа кыттыһан көмөлөспүт дьоммутугар махталбытын тиэрдиэхпитин баҕарабыт. Мүрү нэһилиэгин аҕам саастаах дьоно – уруккута остолобуой үлэһиттэрэ – харчы хомуйан матырыйаал ылан тиксэрбиттэрэ. Ону таһынан баҕа санааларынан салайтаран күн бүгүҥҥэ диэри кэлэн көмөлөһө сылдьар кыргыттарбытыгар махтанабыт. Өнөр нэһилиэгин дьахталларын түмсүүтэ эмиэ биир көхтөөх дьоммут буолалларын бэлиэтиибит. Итиэннэ биһиги психологтарбыт ыыппыт маастар кылаастарыгар үөрэнэн Мүрү 2-с нүөмэрдээх 10 «б» кылааһын үөрэнээччилэрэ уонна Мындааба кырдьаҕастара сахалыы харысхаллары оҥорбуттара.

Ону сэргэ Мүрү 2-с №-дээх дириэктэри иитэр үлэҕэ солбуйааччы Василий Руфовы кытта икки өттүттэн бырайыак оҥостон үлэлэһэн эрэбит. Бу бырайыак 10-с кылаастар ортолоругар волонтер буолуон баҕалаах оҕолорго ананар. Бастакы күн оҕолорго волонтер диэн кимин-тугун кэпсээтибит. Иккис күнтэн саҕалаан байыастарбытыгар ананар таҥастар киэптэрин быһарга үөрэннилэр.

Психологтар үлэлэрэ дьону түмэн уопсастыбаннай тэрээһиннэри ыытыы эрэ буолбакка, сүрүнэ дьон уйулҕатын уоскутуу, бөҕөргөтүү, мунаарбыт ыйытыыларыгар хоруйу булуу, чөл ис туруктаах буолууга араас психологическай дьарыктары ыытабыт.

Оттон күн бүгүн улуустааҕы кииннэммит бибилэтиэкэ кэлэктиибэ матырыйаал ыларга харчынан көмө ууннуллар уонна эмп-томп угар аптечка тигэргэ көмөлөстүлэр.

Бу курдук анал байыаннай дьайыыга дойдубут чиэһин көмүскүү уот кутаа ортотугар сылдьар эр хоһууттарбытыгар күүс-көмө буоларга улууспут тэрилтэлэрэ, түмсүүлэрэ төһүү күүс буолан өйдөрүн-санааларын уураллар.

Мария Аргунова, Мүрү Саһарҕата

Следите за самым важным и интересным в Telegram-канале и WhatsApp-группе ЯСИА