“Биэттэ-АГРО” ХЭТ бурдук хомуурун атырдьах ыйын бүтүүтүттэн саҕалаабыта уонна ааспыт нэдиэлэҕэ түспүт улахан ардах иннинэ түмүктээтэ.
Чопчулаан эттэххэ, балаҕан ыйын 6 күнүгэр олоччу бүтэн комбайннарын бааһынаттан таһаарда. Валовойунан 736 т сиэмэни хомуйан, гектартан ортотунан 13 ц үүнүүнү ылла.
Манна быйыл лизинг көмөтүнэн ылбыт “Вектор” комбайна улаханнык туһалаата. Онон кэлэр сыллааҕы ыһыыга элита кылаастаах “Туймаада” сэлиэһинэй уонна эмиэ элита кылаастаах “Виленская” эбиэс ууруллуоҕа. Маны таһынан, “Виленская” уонна “Покровскай” репродукционнай сиэмэлэр кэлэр сыллааҕы сүөһү аһылыгар анаан ыһыыга уонна фуражка туттуллуоҕа. Билигин хаһаайыстыба күһүҥҥү хорутуу үлэтин, күрүө тутуутун ыыта сылдьар.
Бурдук ыһыытынан дьарыктанар биир улахан хаһаайыстыбалаах Дмитрий Илларионов хаһаайыстыбата 500 т сиэмэ киирэр ыскылаатын тутан бүтэрэн эрэр. Хомуурга бу күннэргэ киирээри бэлэмнэнэр. Барыллааһын быһыытынан 700 т бурдугу хомуйуохтаах. Онон улуус үрдүнэн 1500 т сиэмэ хомуллара сабаҕаланар.
Афанасий Сектяев, Мүрү Саһарҕата
