Саха сирин уопсастыбаннай тырааныспарын саҥардарга 478 мөлүйүөн үбү-харчыны федеральнай дотацияттан көрүөхтэрэ. СӨ Тырааныспарын министиэристибэтэ иһитиннэрбитинэн бу харчынан Дьокуускайы уонна Нерюнгрины саҥа оптуобустарынан хааччыйыахтара, суруйда Саха парламент саайт.
– Федеральнай көмөнү туһанан “Инфраструктура для жизни” национальнай бырайыак чэрчитинэн уопсастыбаннай тырааныспардары саҥардар үлэбитин салгыы ыытыахпыт. Санатан эттэххэ, быйыл чэпчэтиилээх лизинг нөҥүө 50 мөл. солкуобайга саҥа оптуобустары атыыласпыппыт. Онно эбии федеральнай бүддьүөт үп-харчы көрдө, – диэн СӨ Тырааныспарын миниистирэ Владимир Сивцев кэпсээтэ.
3-4 сыл иһигэр Дьокуускай уонна Нерюнгри уопсастыбаннай тырааныспардарын толору саҥардарга былаанныыллар. Санатан эттэххэ, 2022 сыллаахха Саха сиригэр тырааныспар пааркатын саҥардарга бырагыраама үлэлээбитэ. Үс сыл иһигэр Дьокуускай 124 саҥа оптуобустанна. Бу сыл бүтүөр диэри өссө 50 тиэхиньикэ кэлэрэ былааннанар.
