«Олунньуга 28 массыына күлүүһүн туттарарбытыгар сотору кэминэн өссө 17 кэлиэҕэ диэбиппит. Бүгүн 13 улуус киин балыыһата саҥа массыына ылла. Дойду президенэ Владимир Владимирович Путин көҕүлээһининэн үлэлиир «Продолжительная и активная жизнь» национальнай бырайыак чэрчитинэн дьаһал туолар. Быйыл доруобуйа харыстабылын эйгэтигэр 45 тырааныспар ылыллар. 2019 сылтан барыта 376 автомобиль Саха сиригэр дьон доруобуйатын көрүүгэ-истиигэ бэрилиннэ», — диэтэ Айсен Николаев.
11 «УАЗ» уонна 6 «Лада-Нива» массыыналар пациеннары транспортировкалыырга, биологическай матырыйаалы илдьиигэ, ыраах сытар нэһилиэнньэлээх пууннарга эми тириэрдиигэ үлэлиэхтэрэ.
«Түөрт сылга биһиги тоҕус массыына ыллыбыт быраас амбулаториятыгар, фельдшер-акушер пуунугар. Билигин биһиэхэ «Стимул» пилотнай бырайыак үлэлиир. Москваны кытта үлэлиибит, поликлиникабыт медицина көмөтүн оҥоруутун үрдэтэбит», — Таатта улууһун кылаабынай бырааһа Сардана Кононова эттэ.
Өрөспүүбүлүкэҕэ медицина тырааныспарын саҥардыы «Модернизация первичного звена здравоохранения Якутии на 2021–2025 годы» регионнааҕы бырагырааманан «Продолжительная и активная жизнь» национальнай бырайыак чэрчитинэн ыытыллар.
