Саха АССР ат успуордун бастакы үтүөлээх тириэньэрин Свинобоев Иннокентий Саввич-Тыыннаахап туһунан кинигэ сүрэхтэннэ, ол туһунан тыа хаһаайыстыбатын министиэристибэтин пресс-сулууспата суруйда.
От ыйын 20 күнүгэр СӨ тыатын хаһаайыстыбатын уонна аска-үөлгэ бэлиитикэтин министиэристибэтин аактабай саалыгар үөрүүлээх быһыыга-майгыга «Свинобоев Иннокентий Саввич-Тыыннаахап» диэн кинигэ сүрэхтэннэ.
Кинигэни Иннокентий Аммосов уонна Василий Габышев хомуйан оҥордулар. Иннокентий Саввичтыын бииргэ илин-кэлин былдьаспыт өрөспүүбүлүкэ биллииллээх ат баайааччыларын, чулуу сүүрүктэр тустарынан ахтыылартан, хаһыакка бэчээттэммит ыстатыйалартан, урут тахсыбыт кинигэлэртэн түмүллүбүт хомуурунньук буолар.
СӨ тыатын хаһаайыстыбатын уонна аска-үөлгэ бэлиитикэтин миниистирэ Артем Александров бу кинигэ күн сирин көрөрүгэр элбэх үлэни ыыппыт, оҥорон, түмэн таһаарбыт дьоҥҥо Иннокентий Григорьевичка уонна Василий Васильевичка дириҥ махталын биллэрдэ. Саха сиригэр ат успуорда төрүттэнэригэр, сайдарыгар, жокейдар тустаах үөрэхтэнэллэригэр Иннокентий Саввич Свинобоев – Тыыннаахап сүдү кылааты киллэрбит киһи буоларын бэлиэтээтэ.
1968 сылга аан бастакыннан Саха АССР ат успуордун үтүөлээх тириэньэрэ диэн үрдүк аат Иннокентий Саввич Свинобоевка иҥэриллибитэ. Иннокентий Саввич олох эдэр сааһыттан сүүрүк сылгылары дьарыктыыра. 1978 сылтан төһө да кадровай булчут буоллар, бу дьарыгын, олоҕор ылбыт үөрүйэҕин киэҥник тарҕаппыта, уһуйааччы буолбута. 2022 сылга Иннокентий Саввич күн сирин көрбүт Мөҥүрүөн нэһилиэгэр, Маттаҕа Нууралдьын диэн рекордсмен атын тутан турар пааматынньыга аһыллыбыта. Иннокентий Саввич-Тыыннаахап аата 2021 сылга Дьокуускайга Үс Хатыҥҥа баар ипподромҥа иҥэриллибитэ. Бу сыл от ыйын 9 күнүгэр кэргэнинээн Вера Константиновналыын ыал буолбуттара 75 сылын бэлиэтээбиттэрэ.
