Судаарыстыбаннай Дуума аграрнай боппуруостарга кэмитиэтэ ыам ыйын 29 күнүгэр «Тыа сирин туризма уонна территориялар сайдыылара: сокуону уонна өйөбүл ырычааҕын тупсарыы» диэн тиэмэҕэ төгүрүк остуолу тэрийэн ыытта.
Онно Саха Өрөспүүбүлүкэтиттэн «АПК ресурсанан хааччыллыытын киинэ» сударыстыба хааһынатын тэрилтэтин дириктэрин солбуйааччы Семен Плотников кытынна. Кэнники үс сылга «Агротуризм» гранын түөрт хаһаайыстыба (Сунтаартан «Дьол иҥэһэтэ», Горнайтан «Быйаҥнаах» агроуһаайба, Бүлүүттэн «Лүксүгүн» экэпиэрмэ, Мэҥэ Хаҥаластан «Айалаах» эко-турбааза) холбоон 35 мөл. солк. ыланнар үлэлии сылдьаллар. Атын бырайыактар өссө да бааллар эрээри, хотугу улуустар федеральнай ирдэбил кэрискэтигэр сөп түбэһэллэрэ уустук. Ол иһин, тыа сирин туризмын быраабылаларыгар Уһук Хотугу сир уратыта учуоттаныахтаах диэн 5 этиини киллэрбититтэн, икки этии үөрэтиигэ, ырытыыга ылылынна. Икки этии өйөннө.
Ол – Уһук Илиҥҥи федеральнай уокурукка, Аартыкаҕа уонна Уһук Хотугу сиргэ дьону олордорго хапытаалынайа суох тииптээх, собуокка оҥоһуллубатах тэриллэри көҥүллээһин итиэннэ ОКВЭД 01 ( «Сиртэн үүнээйини ылыы уонна сүөһүнү иитии, бултааһын уонна олорго сөп түбһэр өҥөлөр») быһыытынан, үлэһиттэр хамнастарын чопчулааһын.
– Бырайыактарбыт атын эригийиэннэр бырайыактарын кытары күрэстэһэр кыахтаналларын ситиһэргэ биһиги тыа сирин туризмын сайыннарыыга федеральнай бүддьүөттэн үбү тардарга үлэлиибит, – диир Семен Плотников.
Бу туһунан Тыа хаһаайыстыбатын уонна ас-үөл бэлиитикэтин министиэристибэтин пресс-киинэ иһитиннэрэр, суруйда Саха парламент саайт.
