Ил Дархан Айсен Николаев бэҕэһээ өрөспүүбүлэ СМИ-ларын кытта көрсөн кэпсэттэ. Сайдыыга былааннары, күннээҕи олох көрдөрүүлэрин тула ыйытыылар киирдилэр.
Регион баһылыга 2018 сыллаахха ылыллыбыт тыа хаһаайыстыбатын сайдыытыгар аналлаах сокуоҥҥа уларытыылар киирэллэрэ уолдьаспытын эттэ. Бу салаа технология өттүнэн сайдыытыгар уонна онно сөптөөх кадры бэлэмнээһиҥҥэ үлэ барыахтааҕын бэлиэтээтэ.
«Модун, кыахтаах тутуллаах техниканы кытта чахчы үлэлиир дьон тыа хаһаайыстыбатыгар кэлиэхтээх. Биллэн турар, кэтэх хаһаайыстыбалары эмиэ өйүүбүт. Ити эрээри элбэх табаары, бородууксуйаны оҥорон таһаарыыга үрдүк технологияны туттарбыт ордугун билиэхтээхпит»— диэтэ Айсен Николаев.
Баһылык ылыллар дьаһал барыта нэһилиэнньэни куттала суох аһынан-үөлүнэн хааччыйыыга, олох хаачыстыбата тупсарыгар ананарын эттэ.
