Аллайыаха улууһугар бүгүҥҥү күҥҥэ аҕыс киһи коронавируһунан ыалдьыбыта биллэр. Итинтэн иккитэ үтүөрбүт, үс киһи балыыһаҕа эмтэнэр, өссө үс киһи – дьиэтигэр. Улуус суһал ыстаабын быһаарыытынан 75 киһи самоизоляцияҕа сытар. Бу туһунан ulus.media суруйар.
Кулун тутар ыйтан быраастар Чокурдаах аэропордугар 65 рейсы көрсүбүттэрин, 1490 айанньыт доруобуйатын туругун бэрэбиэркэлээбиттэрин, 384 коронавируска ПЦР анаалыһын ылбыттарын туһунан улуус кылаабынай бырааһа Туяра Слепцова кэпсиир.
«Улууска ковиднай салаа Чокурдаахха спортивнай комплекска инфекционнай стационарга баар. «Кыһыл зонаҕа» үлэлиир бастакы биригээдэҕэ терапевт-быраас Сат Шенне Юрьевна, медбрат Евгений Демин, медсестра Алена Капусто, алын сүһүөх сиэстэрэлэрэ Оксана Попова уонна Оксана Томская бааллар«, — диир Туяра Николаевна.
«Билигин үс ыарыһахтан иккитэ үтүөрэн дьиэлэригэр тахсаары сылдьаллар. Анаалыстарын түмүгүн күүтэбит. Нэдиэлэ бүтүүтэ иккис биригээдэ үлэтигэр тахсыа, бастакы харантыыҥҥа барыа. Билиҥҥитэ бэйэбит кыахпытынан үлэлиибит«, — диир быраас.
Суһал көмө муҥутуур бэлэм буолуу эрэһииминэн үлэлиир. Онно биэлсэрдэр Оксана Портнягина, Мария Петрова, Маргарита Базарова үлэлииллэр, кинилэргэ кылаабынай медсестра Риорита Слепцова, хирург-быраас Борбак Балчыр көмөлөһөллөр. Ыарыһахтар мэдэссиинискэй көмөнү учаастактааҕы быраастарын нөҥүө ылаллар. «Бастаан ыарыһах сааһын, дьарҕа ыарыылардааҕын билэбит, доруобуйатын туругун быһаарабыт, онтон алтыспыт дьонун билэбит. Анаалыстар түмүктэрэ биллиэр диэри самоизоляцияҕа олороругар сүбэлиибит«, — диир кылаабынай быраас.
Туяра Слепцова Аллайыаха олохтоохторугар туһаайан ковидтан харыстанар бары миэрэлэри тутуһалларыгар, ыарыы сибикитин билбит буоллахтарына тута биллэрэллэригэр сүбэлиир.
