Томпо улууһун Кириэс Халдьаайы с. көҥүл тустууга ССРС спордун маастара, бэтэрээннэргэ аан дойду үрүҥ көмүс призера, хапсаҕайга Саха сирин маастара Юрий Васильев төрөөбүтэ 70 сылыгар уонна кини кэриэһигэр хапсаҕайга 1-кы өрөспүүбүлүкэтээҕи турнир буолла.
Уолаттар 7 ыйааһыҥҥа күүстээҕи быһаарыстылар. Чемпионнарынан буоллулар: 45 кг — Игорь Горохов (Таатта), 50 кг – Андрей Винокуров (Дьокуускай, кадетскай оскуола), 55 кг – Саша Татаринов (Таатта), 62 кг — Вилиям Ючюгяев (Таатта), 70 кг — Коля Таллаев (Дьокуускай, «Модун» СК), 70 кг үөһэ – Саша Алексеев (Дьокуускай).
Томполор икки үрүҥ көмүс уонна икки боруонса мэтээллээхтэр. Ол иһигэр 70 киилэҕэ Юрий Гаврильевич сиэнэ Максим Васильев иккис буолла. Ону таһынан кадетскай оскуолаҕа үөрэнэр Томпо уола Саша Белолюбскай 62 киилэҕэ эмиэ үрүҥ көмүс мэтээли иилиннэ.
Оҕолорго муҥутуур кыайыылааҕы быһаарсыыга 7 уол суруйтарбытыттан, Саша Алексеев ыйааһына улахан буолан сорохторун судургутук суулуу тутан кэбистэ. Киниэхэ Кириэс Халдьаайытааҕы ОСО уонна спортзал туруорбут мотоцикл сертификатын туттардылар.
Эр дьоҥҥо 70 кг дылы муҥутуур кыайыылааҕы быһаарсыыга 21 хапсаҕайдьыттан СӨ үс маастара инники күөҥҥэ буоллулар. Маастар Айаал Анисимов бастаата. Киниэхэ Байаҕантай нэһилиэгин дьаһалтатын аатыттан 100 тыһ. солк. сертификаты туттардылар. Иккис буолбут Игнат Андросовка Ю.Г. Васильев уола Александр Васильев убаһа бэлэхтээтэ. Үһүс буолбут Егор Ивановка (Үөһээ Бүлүү) Байаҕантай ОДьКХта харчынан бириэмийэ биэрдэ.
Күрэхтэһии кылаабынай судьуйата, Юрий Васильев Дьокуускайдааҕы педучилищеҕа үөрэниэҕиттэн доҕоро Алексей Мостахов: «Тэрээһин олус үчүгэй. Сылын аайы маннык хапсаҕайга өрөспүүбүлүкэтээҕи күрэхтэһиини Томпоҕо ыытыахха диэн этиилээхпин», — диэтэ. Улуус баһылыга Георгий Герасимов кини этиитигэр сөбүлэстэ.
