Бу күн олохторун тутуу эйгэтигэр анаабыт бэтэрээн үлэһиттэри уонна күн бүгүн таһаарыылаахтык үлэлии сылдьар бастыҥ үлэһиттэри чиэстээтилэр, Уус Алдан улууһун пресс-сулууспата суруйар.
Ол курдук, «Саха сирин бочуоттаах тутааччыта» бэлиэни тутуу бэтэрээнигэр Михаил Павловка, «Улуус социальнай-экономическай сайдыытыгар кылаатын иһин» бэлиэни СӨ үөрэҕин, наукатын министиэристибэтин ресурсанан хааччыйыыга дириэктэри солбуйааччытыгар Василий Трифоновка уонна «Престиж» хааччахтаммыт эппиэтинэстээх тэрилтэ салайааччытыгар Василий Андросовка үөрүүлээх быһыыга-майгыга туттардылар. Маны сэргэ бастыҥ үлэһиттэр Бочуотунай грамоталарынан, махтал суруктарынан бэлиэтэннилэр.
Манна даҕатан эттэххэ кэнники 10 сылга улууска 121 тутуу үлэҕэ киирдэ, олор истэригэи элбэх оскуолалар, оҕо уһуйааннара, котельнайдар, култуура кииннэрэ, балыыһалар тутуллан, дьон олоҕун тупсарарга төһүү буоллулар.
2023 сылы улуус баһылыга Алексей Федотов инфраструктура сайдыытын сылынан биллэрбитэ. Онно улуус дьаһалтата сүрүннээбит 7 хайысхатыгар, 107 пууннаах үлэ былаана, улуус депутаттарын Сэбиэтин сессиятыгар бигэргэтиллэн ыытылла турар.
Инникиктин Уус Алдан оройуона тэриллибитэ 100 сылын көрсө 2030 сылга диэри 100 саҥа эбийиэк киириитин анал программата бигэргэммитэ.
Онон инники өттүгэр тутааччылары элбэх үлэ кэтэһэр, кинилэргэ өссө таһаарыылаах үлэни, ситиһиилэри, олохторугар дьолу-соргуну баҕарабыт.
Улуус дьаһалтатын пресс-сулууспата.
