2027/28 үөрэх дьылыттан тоҕус кылаас оҕолоругар барыларыгар историяҕа тылынан эксээмэн туттарыыта булгуччулаах буолуоҕа. Ол туһунан РФ үөрэҕириитин миниистирэ Сергей Кравцов иһитиннэрдэ.
Экзамены оскуолаларга тохсунньу–муус устар ыйдарга ОГЭ-ны туттарыыга көҥүл ылыытын быһыытынан ыытыахтара. Бары сорудахтары саҥа биир кэлим судаарыстыбаннай история учебниктарынан сирдэтэн оҥоруохтара. Биэдэмистибэҕэ быһаарбыттарынан, маннык көрүҥ алҕас талыллыбатах: экспертэр тылынан эксээмэн историяны уонна предмет ис хоһоонун үөрэтии үгэстэригэр ордук сөп түбэһэр дииллэр. 2026/27 үөрэх дьылыгар учууталларга анаан эксээмэн киэбин билиһиннэрээри анал тэрээһиннэр ыытыллыахтара.
2026 сыл балаҕан ыйыттан дойду бары оскуолалара 5-9-с кылаастарга анаан биир судаарыстыбаннай история учебниктарыгар көһүөхтэрэ. Онно уопсай история уонна Россия историята биир кууруска түмүллүбүт, сүрүн миэстэ биһиги дойдубутугар уонна үгэскэ кубулуйбут сыаннастарга ананар. 2023 сылтан маннык учебниктарынан номнуо үрдүкү кылаас оҕолоро, 2024 сылтан колледж устудьуоннара үөрэнэллэр. 2025 сыл балаҕан ыйыттан 5-7-с кылаас үөрэнээччилэрэ, оттон 2026 сыл балаҕан ыйыттан 8-9-с с кылаастар көспүттэрэ.
11-с кылааһы бүтэрээччилэргэ история эксээмэнэ урукку киэбинэн — гуманитарнай идэлэргэ үрдүк үөрэх кыһаларыгар киирэргэ талыы предмет быһыытынан хаалыаҕа. Кулун тутар бүтүүтүгэр саҥа учебниктарынан үлэлииргэ идэни үрдэтиигэ дойду үрдүнэн 64 тыһыынчаттан тахса учуутал барыаҕа.
