Дойду үрдүнэн бэлиэтэнэнр Полярник күнүгэр Тиксиигэ улуустааҕы библиотека ааҕар саалатыгар оскуола оҕолоругар, инбэлиит дьоҥҥо уонна үлэ бэтэрээннэригэр анаан “Поле чудес” оонньуу, викторина күрэхтэрэ ыытылыннылар.
Тэрээһин бастакы чааһыгар Тиксиитээҕи профессиональнай лицей устудьуоннара, Тиксиитээҕи 1 №-дээх оскуола, Арктикатааҕы гимназия 10 кылааһын үөрэнээччилэрэ кэлэн көхтөөх кыттыыны ыллылар. Полярник күнэ хаһан тэриллибитин, туох суолталааҕын, манна ким улахан оруолу оонньообутун туһунан кэпсэттилэр. Үөрэнээччилэр Арктика туһунан өссө дириҥник билэллэрин туһугар онно сөп түбэһэр кинигэлэр быыстапкалара көрдөрүлүннэ. «Оҕолор бэйэлэрин дойдуларын историятын өссө чиҥэтэн үөрэтэллэригэр анаан Арктика туһунан дириҥэтэн сырдатар үлэни күүскэ ыытыахха наада эбит», — диэтэ библиотека үлэһитэ Вуталина Стручкова.
Үс түһүмэхтээх “Поле чудес” оонньууга оҕолор наһаа көхтөөхтүк оонньоотулар. Оонньуу кыайыылааҕынан Тиксиитээҕи 1 №-дээх оскуола үөрэнээччитэ Тихонов Алеша ааттанна.
Оонньуу иккис чааһыгар инбэлиит уонна кырдьаҕас дьон түмүстүлэр.
Бу күн Арктика сирин-уотун туһунан слайд көрдөрүүтэ тэрилиннэ.
