Ойуур пуондатыгар турар үүтээннэри докумуоннатыы — тыа сирин дьонугар биир сытыы боппуруос буолар. Үүтээни хайдах докумуоннатыахха сөбүн туһунан Тааттатааҕы лесничество салайааччыта Петр Уранаев «Таатта» хаһыакка иһитиннэрэр, суруйда Саха парламент саайт.
— Урукку сылларга тутуллубут үүтэннэр бары кэриэтэ докумуона суох тутуулар буолаллар, ону докумуоннатар буоллахха, сири аренда быһыытынан ылаҕын, тэрилтэ эбэтэр урбаанньыт уонна “Уһук Илиҥҥи гектар” бырагыраама нөҥүө ылыахха сөп.
Гектар сири ылыыга сир туһаныытын сынньанар эбэтэр бултуур, балыктыыр көрүҥнэри талан үүтээн туттар сиргин ылыахха сөп. Бу ылбыт сиргин биэс сыл буолан баран, бас билиигэ эбэтэр арендаҕа ылар көҥүллэнэр.
Сири докумуоннатаргар аан бастаан оройуоннааҕы лесничествоҕа тиийэн сиргин чуолкайдаһаҕын. Ол кэннэ сайабылыаннаҕын аренда эбэтэр гектар бырагыраама нөҥүө биэриэххин сөп.
Сир докумуоннамматах буоллаҕына, үүтээн сокуоннайа суох тутуу буолар, ойуур пуондатын сиригэр бэйэ туттуу иһин ыстарааптыыр миэрэлэр көрүллэллэр уонна суут нөҥүө көтүрүү туһунан уураах тахсыан сөп.
