«Ил Дархан Айсен Николаев сорудаҕынан уонна биһиги хампаанньабыт генеральнай дириэктэрэ Павел Маринычев быһаарыытынан, табаһыттар оонньууларыгар хамаанданан күрэххэ бастакы миэстэҕэ — «Урал» мааркалаах вахтовай массыына туруорбуппут. Эбээн Бытантай олохтоохторугар бу техника күүс-көмө буолуо диэн олус эрэнэбит», — диэтэ АЛРОСА гендириэктэри солбуйааччыта Алексей Дьячковскай.
Кини бэлиэтээбитинэн, хампаанньа Саха сирин Арктикатын эргимтэтигэр аҕыйах ахсааннаах олохтоох норуоттары өйүүрэ — үлэтин биир сүрүн чааһа буолар.
«Бу хайысхаҕа ситимнээх үлэ барар, олус суолталаах үлэ. Норуоттар тылларын уонна култуураларын куодун харыстааһыҥҥа көмөлөһөбүт. Бүгүн доҕордоһуу, спорт, култуура уонна үгэстэр бырааһынньыктарыгар сылдьан, дьон төрүтүгэр тардыһар күүһүн көрдүм. Бу олус үчүгэй, киһи өбүгэтигэр төһөнөн чугас да, соччонон күүстээх», — диэтэ салайааччы.
Эбээн Бытантай улууһун муҥутуур кыайыылаах хамаандатын чилиэнэ Марат Слепцов ЯСИА-ҕа эппитинэн, кыайыы кинилэргэ элбэх сыллаах үлэ уонна күн аайы бэлэмнэнии түмүгэ буолар.
««Кочевник» родовой община табаһытабын. Өрөспүүбүлүкэтээҕи оонньуулар биһиэхэ сатабылбытын, үгэспитин, үлэбитин көрдөрөрбүтүгэр кыах биэрэр, атын табыһыттары кытта уопут атастаһабыт. Киирсии күүстээх уонна сытыы этэ, сорох табалар музыка улахан тыаһыттан, элбэх дьонтон куттаммыттара. Ити эрээри кылаабынай бирииһи ыллыбыт. Биһиги общинабытыгар бу улахан уонна суолталаах күн, маннык техника суола-ииһэ суох тайҕанан, туундаранан айанныырга табыгастаах», — диэтэ кини.
Иккис миэстэ уонна УАЗ фургон массыына Томпо улууһун бастакы хамаандатыгар тигистэ. Бирииһи Ил Түмэн депутата Виктор Лебедев туруорда. Үһүс миэстэни уонна тыа хаһаайыстыбатын министиэристибэтэ туруорбут «Буран» техниканы Эбээн Бытантай үһүс хамаандата ылла.
Табаһыттар сүлүөттэригэр барыта 64 спортсмен-табаһыт кытынна, 28 хамаанда 12 оройуонтан кэллэ.
