Таатта улууһун дьаһалтатын аактабай саалатыгар улуустааҕы Уопсастыбаннай сэбиэт уочараттаах мунньаҕа буолан ааста. Мунньаҕы Уопсастыбаннай сэбиэт бэрэссэдээтэлэ Петр Петров салайан ыытта. Мунньахха улуус баһылыга Айаал Бурцев, нэһилиэк баһылыктара, дьокутааттара кыттыыны ыллылар. Октябрьскай нэһилиэктэн баһылык Андрей Семенов, улуус мунньаҕын дьокутаата Михаил Аржаков, Уопсастыбаннай сэбиэт чилиэнэ Римма Таппырова сырыттылар, нэһилиэк тустаах кыһалҕаларыгар санааларын эттилэр, этиилэри киллэрдилэр, Саха парламент саайт суруйда.
Бастакы боппуруоһунан улууска тыа хаһаайыстыбатын туругун, кыстыкка бэлэмнэнии туругун туһунан тыа хаһаайыстыбатын управлениетын салайааччы Гаврил Кычкин билиһиннэриитэ буолла. Атырдьах ыйын 20 күнүнээҕи туругунан улууска отооһун былаана 58,78 % туолбут, халлаан турдаҕына былаан туоларыгар эрэл баар. Үүт былаана 56,46 % буолбут да, сыллааҕы былааны толоруу уустуктардаммыт. Ыанар ынахха кэлбит субсидия харчытын аҥаара кэлбит, тыа хаһаайыстыбатын сайдыытыгар көрүллүбүт 12 мөл. солк. сир оҥоруутунан дьарыктанар «Байым» кэпэрэтиипкэ угуллубут, граҥҥа кыттыы, бааһынай хаһаайыстыба элбээбит уо.д.а. эбит.
Мунньах кыттыылаахтара улуус баһылыга Айаал Бурцев тыа хаһаайыстыбатын сайдыытыгар кыһалларын иһин махтаннылар, салгыы да өйүүрүгэр баҕардылар, бу күннэртэн оттоммотох ходуһаларга «Көҥүл хотууру» биллэрэргэ, сири туһаныыга, сир нолуогар уларытыыны киллэрэргэ, граннарга үлэни күүһүрдэргэ, урукку курдук тыа хаһаайыстыбатыгар үлэлиир дьону көҕүлүүр сыалтан күүрүүлээх, көхтөөх күрэхтэһиилээх «Тыа хаһаайыстыбатын күнүн» сөргүтэргэ уо.д.а. этиилэри киллэрдилэр.
Кыстыкка киирии биир сүрүн боппуруоһунан уһун кыһыны сылаастык туоратан дьон олоҕун чэпчэтэр ОДьКХ туруга буолар. Өрөспүүбүлүкэ үрдүнэн ОДьКХ үлэтин-хамнаһын үгүстүк сырдаталлар, кэпсииллэр. Улуус кыстыкка бэлэмнэниитин туругун туһунан ОДьКХ салаатын салайар Василий Будикин билиһиннэрдэ. Балаһыанньа кытаанах да, онтон тахсарга үлэ барар. Чөркөөх кыбартаалынай хочуолугар чох киллэрэр-таһаарар транспортер, икки улахан кыамталаах носуос бу күннэргэ кэлэллэрин эрэннэрдэ. Саҥа хочуол тутуутугар бырайыактыыр үлэ баран эрэрин этэн эрэли сахта. Онтон оскуола хочуола саахалланар балаһыанньалааҕынан дьиэни эбии холбооботторун, саҥа хочуол тутуутугар үлэ барыаҕын эттэ. Саҥа үлэҕэ киирбит үс этээстээх таас дьиэ сылытар ситимэ сыыһа тардыллыбытын бэдэрээччит бэйэтэ эрэ көннөрөрүн быһаарда. Мунньахха элбэх кыһалҕа этилиннэ, ол курдук чааһынай хочуоллардаах «Теплостройсаха» ХЭТ кыстыкка киирэрэ ыараханын, өрөмүөнү ыытар, кыстыкка бэлэмнэнэр үбэ суоҕун, субсидия ыыппаттарын, «Төлөҥҥө», уокка иэстэрин төлүү иликтэрин, маннык балаһыанньанан тэрилтэ систематын уутун төлө эрэ тардарга бэлэмнэрин этэн туран сүбэ көрдөөтө. Түмүккэ улуус баһылыга тарыыбы үрдэтэргэ этии киллэрдэ, Уопсастыбаннай сэбиэт дьокутааттары, нэһилиэнньэни кытары тустаах министиэристибэлэргэ сурук суруйан түһэрэри мэктиэлээтэ.
Үһүс сүрүн боппуруос үпкэ ананна. Элбэх сыыппара, таблица көрдөрүлүннэ, ороскуоттар, дохуоттар ааҕылыннылар. Быйылгы «Манчаары оонньуулара» пуонда харчытынан ыытыллыбытынан үтүө санаалаах, төрөөбүт дойдуларыгар бэриниилээх биир дойдулаахтарбытыгар өссө төгүл махтанабыт, кинилэринэн киэн туттабыт. Чөркөөххө тутулла турар саҥа спортзалга 13 ыстаат көрүллүөхтээҕин бу күннэргэ туруорсуох, докумуон ыытыах буолан эрэннэрдилэр.
Андрей Семенов Уопсастыбаннай сэбиэт үлэтин, көмөтүн иһин махтанна уонна тутуллан иһэн тохтоон турар кулууп дьиэ тутуутун П.А.Ойуунускай төрөөбүтэ 135 сылыгар бүтэрэргэ туруоруста, өрөспүүбүлүкэ туһугар үтүөлээх улуу дьоммут үбүлүөйдэрин 50-100-150 сылларыгар буолбакка, хас биэс сыл аайы ыытарга, бэлиэтииргэ этии киллэрдэ. Дьокутаат Михаил Аржаков нэһилиэктэр үптэрин көрөргө анал хамыыһыйаны тэрийэргэ туруоруста. Октябрьскай нэһилиэк улуус, нэһилиэк туһугар улууһу, Уопсастыбаннай сэбиэти кытта ыкса үлэлииргэ бэлэмин эттэ. Уопсастыбаннай сэбиэт Чөркөөхтөр араас таһымнаах бырагыраамаларынан үлэлииллэрин, үлэлэрэ таһаарыылааҕын бэлиэтээтэ, көмөлөһөргө бэлэмнэрин биллэрдэ.
