Таатта улууһугар аныгы медицина тэриллэринэн хааччыллыбыт поликлиника арылынна. Улуус доруобуйаҕа харыстабылын тэрилтэтэ бастакытын 16 ханааллаах компьютернай томограф, бронховидеоскоп, видеоколоноскоп, гастроинтестинальнай видеоскоп, видеодерматоскоп тэриллэри тутта.
Киин балыыһа кылаабынай бырааһа Сардаана Кононова эппитинэн, үс этээстээх дьиэ 4000 кв. м иэннээх, манна офтальмолог, оториноларинголог, физиотерапевт уонна да атын быраастар кабинеттара үлэлиэҕэ.
Сардаана Кононова этэринэн, поликлиника киирбитинэн, оройуоҥҥа диагностическай сулууспа үлэтэ күүһүрүөҕэ, медперсоналынан хааччыллыы 80% — 100% тиийиэҕэ.
Саҥа поликлиникаҕа пациеннарга бары усулуобуйа тэриллибит, кэтэһэр саалалар, доруобуйаларыгар хааччахтаах дьон киирэллэригэр-тахсалларыгар ирдэбиллэр толору эппиэттииллэр.
Бырайыак быһыытынан, улахан дьон уонна оҕолор, хат дьахталлар киирэр, диагностика отделениета, лаборатория ааннара тус-туһунан.
Эбийиэк «Доруобуйа» национальнай бырайыагынан тутулунна. Бу тосхолунан быраас амбулаторията, фельдшерскай-акушерскай пууннар баар буолбуттара, стационарга хапытаалынай өрөмүөн ыытылынна, аҕыс тырааныспар ылылынна.
Кэлэр сылга Кыйыга быраас амбулаторията тутуллара былааннанар.
