Анаабыр улууһун Сааскылаах сэлиэнньэтигэр түргэн интернети «Синергетика Арктики» бырайыак чэрчитинэн холбоотулар. Бу спутниктан ВОЛС-ка көспүт иккис оройуон буолар.
Анаабыр улууһун баһылыга Эдуард Платонов бэлиэтээбитинэн, бырайыак үрдүк хаачыстыбалаах уонна түргэн медицина көмөтүн оҥорууга туһаайыллар, манна телемедицина технологията туттуллар, суруйар СИА.
«Историяҕа суолталаах дьаһал. ВОЛС-ка холбонуу олох бары араҥатыгар туһалыаҕа: бу мобильнай сибээс, үрдүк хаачыстыбалаах уонна түргэн медицина көмөтө. Билигин биһиги оҕолорбут наадалаах информацияны кэмигэр ылар кыахтаннылар, сибээскэ өҥө иһин төлөбүр кыччыыр, хааччаҕа суох тарыыптар, IT-технология сайдыыта, туризм уонна хотугу аҕыйах ахсааннаах норуоттар култуураларын харыстааһын уонна да атын элбэх», – диэтэ баһылык.
Санаттахха, Саха сиригэр барыта 13 тыһ килэмиэтир ВОЛС тутулунна, түргэн интернеккэ 373 нэһилиэнньэлээх пуун холбонно, 831 тыһ киһи 3G/4G сотовай сибээһинэн туттар.
