РФ Доброволец сылынан Дьокуускайга «Весенняя неделя добра 2018» диэн үтүө дьыаланы оҥоруу нэдиэлэтэ бэҕэһээҥиттэн саҕаланна. Тэрийээччилэр Дьокуускай куорат ыччакка уонна дьиэ кэргэн политикатыгар управлениета.
Бу нэдиэлэ чэрчитинэн тэрээһиннэр тиһиктээхтик ыытыллаллар. Үтүө дьыаланы оҥорооччулар, уопсастыбаннай тэрилтэлэр, Дьокуускайга үтүө дьыаланы оҥоруу туһунан оскуолаларга аһаҕас уруоктар ыытыллаллар. Тиэргэни, сквердэри, пааматынньыктары ыраастааһыҥҥа субуотунньуктар буолуохтара. Ону сэргэ, пенсионердарга, инбэлииттэргэ, элбэх оҕолоох дьиэ кэргэттэргэ тиэргэни ыраастааһыҥҥа, дьиэни-уоту хомуйууга көмө оҥоһуллуоҕа. «Үтүө санааланыы корзината» акция ыытыллыа. Дьокуускай куоракка кырдьаҕастар уонна инбэлииттэр дьиэлэригэр кэнсиэртэр көрдөрүллүөхтэрэ.
Маны сэргэ, үтүө дьыаланы оҥоруу нэдиэлэ чэрчитинэн, «За вклад в развитие Добровольчества» бэлиэ макетын оҥорууга куонкурус биллэрилиннэ.
Үтүө дьыаланы оҥоруу нэдиэлэтин түмүгэ муус устар 21 күнүгэр култуура уонна сынньалаҥ пааркатыгар күнүс 14.00 ыытыллыа. Кэнсиэргэ Уйусхаан Борисовка (диагноһа– ДЦП, двойная гемиплигия тяжелой степени тяжести, задержка психоречевого развития) көмөлөһөр сыаллаах үтүө санааланыы аукциона тэриллэр. Акуциоҥҥа эстрада биллэр-көстөр ырыаһыттара, блогердар, уопсастыбаннай диэйэтэллэр кыттыыны ылыахтара. Үтүө санаалаах буол, кэрэни, үчүгэйи оҥорорго дьулус.
«Весенняя неделя добра 2018» анал нэдиэлэҕэ кыттыахтарын баҕалаахтар 89241653506 төлөпүөнүнэн билсиҥ. Эһигини «Город Добра» общественнай организация күүтэр.
This post was published on 18.04.2018 09:21 09:21