Балаҕан ыйын 3-5 күннэригэр Дьокуускайга «Сырдаа!» информационнай-сырдатар акция буолар, ол чэрчитинэн оҕолорго сырдыгынан тыгар бэлиэлэр уонна брелоктар бэриллиэхтэрэ. Бу туһунан Саха Сирин Госавтоинспекциятыттан иһитиннэрдилэр.
Волонтердар Доҕордоһуу болуоссатыгар уонна култуура уонна сынньалаҥ пааркатыгар сэрэдэттэн бээтинсэҕэ диэри 11:00 — 19:00 чааска үлэлиэхтэрэ. Кыра пассажиры, сатыы киһини эбэтэр велосипедиһы хайдах харыстыыр туһунан сүбэлэри этиэхтэрэ, ону тэҥэ тиэмэлээх буклеттары, туһалаах сувенирдары туттарыахтара.
Сырдыгынан тыгар аксессуардарынан суоппардар хараҥаҕа оҕону ыраахтан көрөр кыахтаныахтара.
«Суол хас биирдии кыттыылааҕар – кырачаан сатыы сылдьааччыга, пассажирга, велосипедистка — улахан дьон болҕомтолоро наада. Суол быраабылатыгар уруоктар, суолга куттала суох сылдьыыга сүбэлэр, экипировка, уруулга сэрэхтээх буолуу» — диэн Госавтоинспекцияҕа тоһоҕолоон бэлиэтииллэр.
