«Хоккайдо Корпорэйшен» дьоппуон АУо, «Дьокуускай куорат» уокуруктааҕы дьаһалтата, «Алмаасэргиэнбанк» АКБ бииргэ үлэлээһин боротокуолугар илии баттастылар. Бу туһунан «Алмаасэргиэнбаан» уопсастыбаннаһы кытта сибээһи олохтуур сулууспата иһитиннэрэр.
Сылы быһа эргиччи үлэлиир теплица комплексын тутуу боротокуолга биир дьоһун миэстэни ылла. Куорат баһылыга Айсен Николаев бу бырайыагы олоххо киллэриинэн элбэх ыйытыы биэрдэ. «Саха сирин тыйыс усулуобуйатын теплицалар тутуллара тулуйуо дуо? Тутуллуохтаах «Хаҥалас» ТОР инфраструктурата теплица гааска, уокка, ууга холбонуутун хааччыйыа дуо?», — диэн баһылык токкоолосто.
Дьоппуоннар бырайыак бары ирдэбиллэргэ сөп түбэһэрин, ол инниттэн анаан-минээн теплица тутуллуохтаах сирин көрбүттэрин, айылҕа көстүүлэрин үөрэппиттэрин этиннилэр. «Олохтоох дьону дьоппуон технологиятынан тутуллар теплицаҕа үлэлииллэригэр былаан быһыытынан үөрэтиэхпит. Барыта сатаныахтаах. Бу сыл ахсынньытыгар бастакы хомууру куорат олохтоохторо, ыалдьыттара сөптөөх сыанаҕа атыылаһар кыахтаныахтара», — диэтилэр делегация чилиэннэрэ.
