Сокуоннайа суох сыбаалканы хомуйууга Дьокуускай куорат Арассыыйаҕа уон бастыҥ иһигэр киирдэ. Бу туһунан Бүтүн Арассыыйатааҕы Норуот фронун (ОНФ) сайтыгар суруйдулар. «Генеральнай уборка» бырайыак координатора Дмитрий Миронов этэринэн, бастыҥнар испииһэктэрин Искитим, Нижнекамскай уонна Бугульма куораттар саҕалыыллар.
edersaas.ru
«Рейтиҥҥэ бастакынан Новосибирскай уобалас Искитим куората ааттанна. Манна ОНФ актыбыыстара 71 сыбаалканы булан, 69 хомуйбуттар. Иккис миэстэҕэ Татарстан өрөспүүбүлүкэтин Нижнекамскай куората таҕыста. Нижнекамскайга 35 сыбаалканы барытын ыраастаабыттар. Эмиэ Татарстан Өрөспүүбүлүкэтин Бугульма куората үһүс миэстэ буолла. Манна 20-тэн 19 сыбаалка хомуйдулар«, — диир кини. Барнаул, Тамбов, Дьокуускай, Ханты-Мансийскай, Альметьевскай уонна Псков куораттар бастыҥнар испииһэктэригэр сылдьаллар.
«Дьокуускайга 2017 сыл олунньутуттан саҕалаан 24 сыбаалканы булбуттар. 23-н хомуйбуттар. Kartasvalok.ru сайтка ким баҕарар сыбаалканы ыйан бэлиэтиэн сөп. Оччоҕо куораппыт ырааһырыа, тупсуо, чэлгийиэ», — диэтилэр ОНФ Саха сиринээҕи салаатыгар.
Бастыҥнары таһынан, саамай элбэх сыбаалкалаах куораттар эмиэ ааттаннылар: Тобольскай (Тюменскай уобалас), Чебоксары (Чувашия), Первоуральскай (Свердловскай уобалас), Вязьма (Смоленскай уобалас), Бологое (Тверь уобалаһа).
Сокуоннайа суох сыбаалканы хомуйуу үлэтэ күргүөмнээхтик барбыта хас да сыл буолла. Ил Дархан э.т. Айсен Николаев мэринэн үлэлиэҕиттэн куораты ыраастааһын боппуруоһун тус хонтуруолугар ылбыта.
Николай Попов, «Саха сирэ» хаһыат, edersaas.ru
