Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи, Улуу Кыайыы 80 сылларыгар уонна Сунтаар улууһугар Сергей Афанасьевич Зверев-Кыыл Уола төрөөбүтэ 125 сылыгар аналлаах «Олоҥхо дойдутун ытык күнэ – Сунтаар уйгулаах ыһыаҕа» бүгүн саҕаланна диэн Сунтаар сонуннара хаһыат саайта суруйар
«Үрүҥ тунах ыһыаҕынан эһигини барыгытын Сунтаар улууһун дьаһалтатын, оройуон дьокутааттарын Сэбиэтин уонна тус бэйэм ааппыттан ис сүрэхтэн итиитик-истиҥник эҕэрдэлиибит», — диэн улуус баһылыга Анатолий Григорьев эҕэрдэлээтэ.
Кини Улуу Тунах ыһыах сахалар сүдү баайбыт, киэн туттуубут буолан, омукпут уратытын бэлиэтиир, улуу олоҥхобутун, оһуохайбытын аар-саарга ааттататар тэрээһин буолар диэн бэлиэтээтэ.
!Үрдүк Айыыларга сүгүрүйэр, айгыр-силик айылҕабытын кытта алтыһар ытык-мааны күммүтүгэр норуоппут өйө-санаата түмүллэр, үс кута бөҕөргүүр, өрөгөй талаана арыллар. Дьон-сэргэ кыстыгы этэҥҥэ туораан, күөх дуолга үктэммитин уруйдаан, ирэ-хоро сэһэргэһэр, ийэ тылга, төрүт култуураҕа дириҥ ытыктабылын көрдөрөр. Манна сытар – ыһыах ис күүһэ, киэҥ биһирэбилэ. Үйэлэри уҥуордаан илдьэ кэлбит үтүө үгэстэрбитин кэлэр көлүөнэлэргэ бүөбэйдээн, харыстаан чөл тириэрдии — бу биһиги ытык иэспит», — диэтэ Григорьев.
