Аммаҕа 800-тэн аҕыйах нэһилиэнньэлээх нэһилиэктэр икки ардыларыгар волейболга күрэх буолан ааста. Күрэх X-с волейболга республикатааҕы күрэххэ Амма улууһун аатыттан кыттарга сүүмэрдээһининэн буолан, олус тыҥааҥыннаахтык ааста.
Сулҕаччы нэһилиэгиттэн дьоҥҥо уонна дьахталларга икки хамаанда баран ситиһиилээхтик кыттан кэллилэр. Эр дьон командатыгар оонньоотулар: Игорь Исаков, Радислав Стручков, Данияр Тышканбаев, Алексей Данилов, Александр Капитонов, Геннадий Михайлов, Егор Никитин, капитан Айсен Христофоров. Дьахталларга оонньоотулар: Диана Фелегонова, Роксана Васильева, Мария Максимова, Уйгулана Карманова, Эльвира Данилова, Олеся Стручкова Нюргустина Павлова (капитан). Күрэххэ барар кыттааччылар Айсен Христофоров уонна Нюргустина Павлова тэрийэн, бэлэмнээн ситиһиилээхтик кыттан кэллилэр.
Ол курдук тыҥааһыннаах күрэххэ эр дьоҥҥо Сулҕаччы сүүмэрдэммит хамаандата I-кы миэстэни эрэллээхтик ылла, II-с миэстэни Чакыр, III-с миэстэни Алтан нэһилиэктэрэ ыллылар. Дьахталлар күрэхтэрэ эмиэ киирсиилээхтик ааста, түмүккэ I-кы миэстэ Эмис , II- с миэстэ Алтан, III-с миэстэ Сулҕаччы нэһилиэктэринхамаандалара буоллулар.
Күрэхтэһии түмүгүнэн Сулҕаччы эр дьон хамаандата кыра нэһилиэктэр истэригэр волейболга 2024 сыл тохсунньу 12-14 күннэригэр Үөһээ Бүлүү улууһун Тамалакаан нэһилиэгэр ыытыллар X-с республикатааҕы волейбол күрэх финалыгар кыттар путевканы эрэллээхтик ыллылар. Онон кыра нэһилиэктэргэ республикаҕа улуус чиэһин көмүскүү барыахтара. Бэлиэтээн эттэххэ, күрэхтэһиигэ элбэх дьону илдьэ барара ыраах олорор нэһилиэккэ ороскуоттаах буолар, онон транспорынан уонна бензининэн көмөлөспүт олохтоох дьаһалтаҕа (баһылык Артем Степанов) спортсменнар махтаналлар.
Елена Попова, «Амма олоҕо» хаһыат
