Көрдөрүүгэ устар бөлөх, Егор Оконешников кэргэнэ Мариналыын бааллар. Кинилэр историяларыгар олоҕуран киинэ уһуллубута.
Киинэ продюсера Степан Порядин эппитинэн, киинэ устуутугар 10 мөл солк барда. Саха сирин кыһыныгар киинэни устуу боростуойа суоҕун эттэ: сүүрбэ киһи халыҥ сонноох, ыстааннаах аттар турар хотонноругар устууну ыыппыттара ыарахан этэ.
Режиссер Алексей Амбросьев-кырата устар бөлөххө махтанна, түөрт кэриҥэ сыл устата киинэни устан, тиһэҕэр тириэрдибиттэрэ сөҕүмэр буоларын эттэ.
Көрөөччүлэр устар бөлөх уонна артыыстар оонньууларын үчүгэйдик сыаналаатылар. Кинилэр эппиттэринэн, киинэ лентата ат сүүрдүүтүгэр азарт эрэ биэрбэт, олох ыарахаттарын кыайыыга сирдиир.
«Спидстар долгутта уонна ыра санаа туолуутугар эрэли сахта. Бүтэһик сөкүүндэҕэ диэри киһи күүрэн олорон көрөр киинэтэ, геройдар тустарыгар ыалдьаҕын, күрэхтэһии күүрээнигэр киирэҕин», – ЯСИА-ҕа көрөөччү Максим эттэ.
Киинэ саха кинематографиятыгар чаҕылхай көстүү буолара чуолкай. Оҥорон таһаарааччылар хартыына киэҥ аудиторияҕа сөбүлэтэригэр уонна тус сыаллары ситиһиигэ сирдииригэр эрэллээхтэр.
