Арассыыйа Федерациятын Бэрэсидьиэнин Ыйааҕын толоруу уонна Национальнай судаарыстыбаннай бэлиитикэ стратегиятын олоххо киллэрии чэрчитинэн, Арассыыйаҕа Норуоттар сомоҕолоһууларын сылынан Саха Өрөспүүбүлүкэтигэр ыытыллар сүрүн дьаһаллар былааннара бигэргэннэ, суруйда Саха парламент саайт.
Докумуон судаарыстыбаннай былаас уонна олохтоох салайыныы уорганнарын, тустаах биэдэмистибэлэр этиилэригэр, былааннарыгар итиэннэ ааспыт 2025 сыл ахсынньытыгар ыытыллыбыт стратегическай сиэссийэҕэ көтөҕүллүбүт көҕүлээһиннэргэ тирэҕирэн оҥоһулунна.
Тиэмэлэринэн алта блогунан таҥыллыбыт былааҥҥа 111 дьаһал киллэрилинэ.
Ордук бөдөҥнөрүттэн ыллахха, онно бааллар: «Норуоттар эйэлэрин уонна сөбүлэһиилэрин туһугар сомоҕолоһуу» норуоттар икки ардыларынааҕы пуорум; «Доҕордоһуу поеһа: Кыайыыга бииргэ!» норуоттар икки ардыларынааҕы култуурунай-үөрэтэр бырайыак; «Сибиир уонна Уһук Илин этносоциальнай бырассыастара: национальностар икки ардыларынааҕы проблемалар уонна кыахтар» Бүтүн Арассыыйатааҕы билим-быраактыка кэмпириэнсийэтэ; «Кулаковскайтан Гамзатовка диэри» эрэгийиэннэр икки ардыларынааҕы култуурунай-сырдатар бырайыак; Аҕа дойду сэриитигэр Улуу Кыайыы 81 сылыгар анаммыт «Норуоттар сомоҕолоһуулара Кыайыыны уһаммыта» уус-уран тыл өрөспүүбүлүкэтээҕи бэстибээлэ; «ЭтноРан Саха сирэ 2026» өрөспүүбүлүкэтээҕи сүүрүү; «Саха Өрөспүүбүлүкэтин улуустарыгар култуура эстэпиэтэлэрэ» өрөспүүбүлүкэтээҕи медиабырайыак.
Арассыыйаҕа Норуоттар сомоҕолоһууларын сылынан Саха Өрөспүүбүлүкэтигэр ыытыллар сүрүн дьаһаллар толору былааннарын https://mvsdn.sakha.gov.ru/god-edinstva-narodov сигэнэн билсиҥ диэн Саха Өрөспүүбүлүкэтин Тас сибээстэргэ уонна норуоттар дьыалаларыгар министиэристибэтин пресс-киинэ суруйар.
