6 миэтэрэлээх стела 14-с куорпус кэннигэр турбут. Сайыҥҥылыы ылааҥы күн искибиэр иннигэр Айыы Уолун ырыалара дьиэрэйэллэр, дьон-сэргэ тоҕуоруспут.
Алгысчыт, Арассыыйа үтүөлээх артыыһа Дмитрий Артемьев арыылаах алаадьынан, сыалаах саламаатынан аал уотун айах тутан, алҕаата.
Александр ийэтэ Марфа Иннокентьевна Дьокуускай куоракка өйдөбүнньүк мэҥэ таас туруорар баҕа санаа 2017 сылтан үөскээбитэ диэн эттэ. Киин куоракка сир булар уустук. Ол эрээри, анаабыт курдук, эдэр саас уйаламмыт Сэргэлээҕэр, Айыы Уола ыллаабыт-туойбут сиригэр хатыҥнардаах бүччүм сир көстөн, барыта табыллыбыт. Ол курдук хас да сыл туруорсан, сүүрэн-көтөн, көҥүл ылан, оҥорторон, анаммыт чааһа үүннэ.
Саша 1998 сыллаахха СГУ культурология салаатыгар киирбитэ. Ол эрээри, ситэ үөрэммэккэ, сырдык тыына быстыбыта.
Култуура, духуобунай сайдыы миниистирэ Афанасий Ноев:
— Бүгүн сайыҥҥылыы сылаас, чаҕылхай күн Айыы Уолун искибиэрэ аһыллар дьоро түгэнэ үүннэ. Бу биһиэхэ барыбытыгар үөрүүлээх, көмүс түгэн. Марфа Иннокентьевнаны ис сүрэхпиттэн эҕэрдэлиибин. Өр сылларга баҕарбыт баҕаҥ туолар өрөгөйдөөх күнэ үүннэ. Дьон-сэргэ, салайааччылар өйөөбүттэрэ элбэҕи этэр. Үп министиэристибэтин гранынан олоххо киирэр кыахтанна. Мин Айыы Уолун кытта алтыспыт дьоллоохпун. Кини ыраас, сырдык санаалаах, дьоҥҥо үтүө-кэрэ суолу хаалларбыт буолан, барыта анаабыт курдук, табылынна. Кини мэҥэ тааһа ыччаты үрдүккэ сирдии турдун, — диэн эттэ.
Стеланы скульптор Степан Лукин чочуйан оҥорбут. Улахан гитара быһыылаах, онно Айыы Уола мичээрдээбит мөрсүөнэ көстөр. Искибиэри таас билиитэнэн оҥорбуттара, ыскамыайкалары туруорбуттара. Манна номнуо гитаралаах ыччаттар мустан, Айыы Уолун ырыаларын ыллыыллар.
