2025 сыллаахха Мэҥэ Хаҥалас улууһун Томтор уонна Төхтүр сэлиэнньэлэригэр 100 миэстэлээх икки сүөһү иитэр комплекс тутуллубута. Үлэ сырыытын чэрчитинэн өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников бу эбийиэктэргэ сырытта.
700 кв.м иэннээх «Томтор» ХЭО сүөһү хотонун тутарыгар анаан өрөспүүбүлүкэ бюджетыттан 10 мөл. 35 тыһ. солк. көрүллүбүт, ону тэҥэ тэрилтэ бэйэтин үбэ 1,1 мөл. солк. Эбийиэк ааспыт сыл сэтинньитигэр киллэриллибитэ.
Төхтүр сэлиэнньэтигэр «Илгэ» тыа хаһаайыстыбатын потребительскай хааччыйар кээпэрэтиибин сүөһүлэрэ тутар хотоннорун тутууга регионнааҕы бюджеттан үбүлээһин 14,7 мөл.солк. тэҥнэстэ, оттон бэйэ үбэ-харчыта 1,2 мөл. тахса буолла. Эбийиэк быйыл сэтинньи ыйга үлэҕэ киириэҕэ. Манна кээпэрэтиип 16 хаһаайыстыба сүөһүтүн иитиэҕэ.
Хаһаайыстыбалар салайааччылара Денис Жирков уонна Евдокия Холмогорова кыра кыамталаах эбийиэктэри тэрийиигэ боломуочуйалары биэрии көмөтүнэн муниципальнай тэриллиилэр өрөспүүбүлүкэ бюджетыттан үбү-харчыны материальнай-производственнай базалары саҥардар кыахтаммыттарын, сүөһү иитээччилэр үлэлэрин чэпчэтиигэ көмөлөһөллөрүн бэлиэтээтилэр.
«Аныгы, толору механизацияламмыт хотоннор кылгас кэм иһигэр тутулуннулар. «Томтор» ХЭО саҥа эбийиэгэр хайыы-үйэ таһаарыылаах үлэ барарын бэлиэтиэххэ наада. Тэрилтэни эдэр киһи салайара кэрэхсэбиллээх. Бүгүн өрөспүүбүлүкэҕэ ыччаты тыа хаһаайыстыбатыгар тардыыга усулуобуйа тэрийиигэ, бастатан туран, үлэ усулуобуйатын тупсарыыга сорук туруорулунна. Быйыл кыра кыамталаах эбийиэктэри тэрийиигэ судаарыстыбаннай бырагырааманы олоххо киллэрэргэ 590 мөл.солк. көрүлүннэ», — диэн тоһоҕолоон бэлиэтээтэ Сергей Местников.
Санатан эттэххэ, 2025 сылтан муниципальнай оройуоннар дьаһалталара аграрнай производство уратыларын учуоттаан, 15 өйөбүл хайысхатынан тыа хаһаайыстыбатын сайыннарыы бэлиитикэтин бэйэлэрэ быһаараллар, ол иһигэр субсидия ылааччылар ставкаларын уонна категорияларын быһаарыы, итиэннэ кыра тыа хаһаайыстыбатын эбийиэктэрин тутууну, 100 төбөҕө тиийэр сүөһү хотоннорун киллэрэн туран.
Саха сирин баһылыга Айсен Николаев стратегическай ыйааҕынан 2030 сылга үүт бородууксуйатын оҥорон таһаарыы кээмэйин сылга 15 тыһыынча туоннаҕа диэри улаатыннарыы быһаарылынна.
Тэрээһин дойду президенэ Владимир Путин бэлиэтээбит сыалын-соругун ситиһиигэ туһуланар -2030 сылга агропромышленнай комплекс бородууксуйатын оҥорон таһаарыы кээмэйин, 2021 сыл таһымынан тэҥнээтэххэ, 25 бырыһыантан итэҕэһэ суох улаатыннарыахтаахпыт.
