Аҕыс оҕону иитэр Горнай улууһуттан Айтал уонна Саргылана Никаноровтар дьиэ кэргэннэрэ «Сыл Ыала» Бүтүн Россиятааҕы «Эдэр ыал» куонкурус кыайыылааҕынан таҕыста. Наҕараадалааһын үөрүүлээх сиэрэ-туома Москваҕа «Россия» национальнай кииҥҥэ ыытылынна.
«Бу үрдүк уонна үтүөлээх наҕараадаҕытынан биир дойдулаахтарбытын истиҥник эҕэрдэлиибин. Никаноровтар оҕолорго таптал, дьыалаларыгар бэриниилээх буолуу үтүө үгэһи иҥэрэр педагогическай династияны салҕыыллар. Кинилэр дьиэлэригэр инникитин үлэлиэхтээх профессионаллар эрэ буолбакка, аһаҕас сүрэхтээх, учуутал билиитин-көрүүтүн, үлэтин ытыктыыр дьон улаатар. Маннык дьиэ кэргэн көлүөнэлэр уурбут сыаннастарын бигэ акылаат оҥосторун көрдөрөр.
Саха ыаллара сылтан сыл Россияҕа бастыҥнар ахсааннарыгар киирэллэрин көрөр үөрүүлээх. Бу биһиги сүрүн баайбытын — таптал, үлэһит буолуу, инникигэ эрэл иҥпит күүстээх ыалларбытын этэр. Чуолаан маннык дьоҥҥо Саха сирэ тутуллар», — диэн регион баһылыга Айсен Николаев телеграм-ханаалыгар суруйда.
