Дьокуускайга өрөспүүбүлүкэ ыччат дьыалаларыгар министиэристибэтэ, «Патриот» киин уонна Саха сирин патриотическай тэрилтэлэрин икки ардыларыгар бииргэ үлэлээһин туһунан сөбүлэһиигэ илии баттаатылар, ол туһунан ЯСИА иһитиннэрэр.
«Бу сөбүлэһии патриотическай хайысхаҕа үлэни бэрээдэктииргэ аналлаах. Ырытыы көрдөрөрүнэн, патриотическай хайысхалаах тэрилтэлэр дьаһаллара үгүстүк алтыһаллар. Итинэн биһиги министиэристибэбит дьарыктанара сөптөөх», — диэтэ ыччат дьыалаларыгар уонна социальнай коммуникацияларга миниистир Петр Шамаев.
Миниистир биэдэмистибэ былааныгар тэрилтэлэр алтыһан үлэлииллэригэр биир улахан былааны тэрийиини иһитиннэрдэ. Ону тэҥэ бу сөбүлэһии бастакы буоларын, кэлин элбиирин бэлиэтээтэ.
«Бүгүн маннык сөбүлэһии түһэрсиллибититтэн олус үөрэбин. Өрөспүүбүлүкэҕэ патриотическай хайысхалаах тэрилтэлэр элбэхтэр, кинилэр биир ситимҥэ ылсан үлэлииллэрэ олус үөрүүлээх. Үлэ элбэх, кылаабынайа, салгыы хайдах сайдарга көрүү баар», — диэн «Патриот» ыччат киинин дириэктэрэ Сулустан Заболоцкай эттэ.
