Тэрийээччилэр этэллэринэн, быйыл үс күн устата 4-5 тыһыынча киһини мунньар былааннаахтар, ГТО нуорматын туттарар баҕалаахтары. Тэрилтэлэр кэлэктииптэрэ, үөрэнээччилэр, устудьуоннар уонна спортсменнар кытталлар. Санаттахха, Манчаары оонньууларыгар кыттар спортсменнарга ГТО туттарыыта булгуччулаах. Онон спорт национальнай көрүҥнэрин бэрэстэбиитэллэрэ элбэхтэр.
«Дойду президенэ Владимир Путин 2014 сыллаахха ГТО туттарыытын саҥардыбыта. Ол кэмтэн Саха сиригэр нуорманы туттарыы көхтөөхтүк барар. Ордук ыччат кэлэр, оскуола оҕолоро, кинилэргэ үрдүк үөрэххэ киириигэ баал эбиллэр. Баҕалаах бары туттарар, анал кииннэр үлэлииллэр», — диэтэ спорт миниистирэ Леонид Спиридонов.
Бу күн ГТО кыһыл көмүс бэлиэтин Тулагы-Киллэм нэһилиэгин баһылыга Егор Попов, буулдьанан ытыыга Россия спордун маастара Дария Иванова, спорт адаптивнай көрүҥнэригэр Спартакиада призера Эльвира Хусаинова, оскуола үөрэнээччитэ Константин Гатилов туттулар.
Хаартыска: Дьулустаан Сергеев/ ЯСИА
