Дьокуускайга «Б8» акселератор XIV түһүмэҕин демо-күнэ буолуоҕа, онно 12 ИТ-бырайыак экспертэргэ уонна дьүүллүүр сүбэҕэ быһаарыыларын билиһиннэриэҕэ.
Хамаандалар үс ый акселерационнай бырагырааманыы, менторскай өйөбүлү уонна маастар-кылаастары аастылар, оттон үлэ түмүгүнэн бырайыактары аһаҕастык көмүскээһин буолуоҕа. Кинилэртэн бастыҥнар үбүлээһин тутуохтарын сөп.
Стартаптары коммерческай кыахтарынан, технологическай ситиһиилэринэн, быһаарыыларын далааһыннарынан уонна хамаандалар презентациялыыр үөрүйэхтэринэн сыаналыахтара. Бырайыактар ортолоругар HR уонна үп автоматизациялыыр сервистэр, Big Data көмөтүнэн бизнес миэстэлэрин талар платформалар, өҥөнү оҥорор агрегатордар, ИИ-риелтор, бэйдиэ сылдьар кыылга көмөлөһөр социальнай бырайыак уонна да атын бородууксуйалар бааллар.
Бырайыактары сайдыы корпорациятын, экспорга өйөбүл киинин, Москватааҕы венчурнай пуонда бэрэстэбиитэллэрэ, ону тэҥэ Ykt экспертэрэ уонна ментордара, Sinet Sparк пуондатын уонна тас дойдулар экспертэрэ сыаналыахтара.
«Б8» акселератор инновацияны сайыннарыы пуондата («Корпорация развития» ГК киирэр) 2019 сылтан ыытыллар. Бу кэмҥэ бырагыраама нөҥүө 100-тэн тахса бырайыак ааста, көрүллүбүт үбүлээһин кээмэйэ 121 мөл.солк. тахса буолла.
Бырайыагы көмүскээһини баҕалаах барыта көрүөн-истиэн сөп. Саҕаланыыта: ахсынньы 29 күнүгэр 16:00 чааска Үлэ Кыбаарталыгар, 1 этээс.
