Саха сирин баһылыга Айсен Николаев өрөспүүбүлүкэ сайдыытын Корпорациятын үлэтин боппуруостарыгар сүбэ мунньах ыытта.
Айсен Николаев урукку сылларга корпорация салалтатыгар таһаарыылаахтык үлэлээбит, дойдуга креативнай экономикаҕа кадрдары бэлэмниир кылаабынай үрдүк үөрэх — Россия креативнай индустрияҕа университетын ректора буолбут Афанасий Саввиҥҥа махтанна.
«Кэлиҥҥи сылларга корпорация өрөспүүбүлүкэ инновационнай уонна креативнай сайдыытын экосистиэмэтин улахан сорҕото буолла. Афанасий Саввин салайааччылаах хамаанда көмөтүнэн «Квартал Труда» креативнай кластер курдук суолталаах бырайыактар олоххо киирдилэр, оттон Саха Сирэ биһиги дойдубутугар креативнай индустриялар сайдыыларын биир билиниллибит лидерэ буолла», — диэтэ өрөспүүбүлүкэ баһылыга.
Регион салайааччыта бүгүн Василий Ефимов салайааччылаах саҥа хамаанда иннигэр улахан соруктар туралларын бэлиэтээтэ. Корпорация хайыы-үйэ ситиһиллибити таһынан тахсан, мунньуммут уопутугар тирэҕирэн сайдыахтаах.
Айсен Николаев хамаанда корпорацияны судаарыстыба, бизнес уонна уопсастыба күүһүн түмэр сүрүн үүнүү института оҥоруохтааҕын тоһоҕолоон бэлиэтээтэ. Болҕомто киинигэр — инвестициялары тардыы, туризмы, экспоры уонна креативнай экономика саҥа хайысхаларын сайыннарыы.
«Корпорация идеялар үөскээн, бырайыактар ситэн, дьон олоҕун хаачыстыбатын тупсарар быһаарыылар олоххо киирэр былаһаакка буолуохтаах. Үлэ сүрүн сыала — өрөспүүбүлүкэ сайдыыта, олохтоохторго саҥа кыахтары тэрийии уонна иннин диэки эрэллээхтик хамсааһын. Саха сирэ мэлдьи бэйэтин дьыалатыгар эрэллээхтэри түмэр. Бүгүн сайдыы Корпорацията сомоҕолоһуу холобура буолан, кэскили толкуйдуур, дьыала туһугар тугу барытын оҥорор хамаанда буолара улахан суолталаах», — диэн Айсен Николаев соругу туруорда.
Сүбэ мунньахха СӨ бырабыыталыстыбатын бэрэссэдээтэлин солбуйааччы Анатолий Семенов, баайга-дуолга уонна сиргэ сыһыаннаһыыларга миниистир Павел Багынанов, экономика миниистирэ Петр Попов, Саха сирин сайдыытын Корпорациятын генеральнай дириэктэрэ Василий Ефимов кытыннылар.
