Саха сиригэр оҥоһуу өй төрүттэригэр үөрэтиини хайыы-үйэ оскуола сааһыгар күүскэ киллэрэр былааннаахтар. Бу туһунан Ил Дархан Айсен Николаев «Якутия, вперед!» эпиир биэриитигэр эттэ.
«Бу күннэргэ Саха Өрөспүүбүлүкэтин бырабыыталыстыбатын бэрэссэдээтэлин солбуйааччытыгар уонна өрөспүүбүлүкэ үөрэҕин уонна билимин министиэристибэтигэр оҕолору оскуолаларга оҥоһуу өй төрүттэригэр үөрэтии боппуруоһугар боччумнаахтык сыһыаннаһыахтаахпыт диэн сорудаҕы биэрдим. Кинилэри тустаах платформаларынан туһанарга эрэ үөрэппэккэ, бастатан туран, оҥоһуу өй диэн тугун-ханныгын өйдүүргэ көмөлөһөр суолталаах. Үгүс улахан дьон билигин даҕаны ханнык эрэ аһара өйдөөх- санаалаах курдук ылыналлар эбээт, чахчытыгар ол сөп түбэспэт», — диэтэ регион баһылыга.
«Оҥоһуу өй – кэскил буолбатах, бүгүҥҥү кэм. Ону омук сиригэр да, биһиэхэ да дойдуга, экономика араас салааларыгар, судаарыстыбаннай салайыыга, социальнай эйгэҕэ көхтөөхтүк тутталлар. Бу технологияттан сэрэнэрбит оннугар, регион ураты айылҕа-килиимэт усулуобуйатын уонна транспортнай уратыларын кытта сибээстээх уустук соруктары быһаарыыга кини кыаҕын туһанарга дьулуһуохтаахпыт», — диэн Айсен Николаев тоһоҕолоон бэлиэтээтэ.
Кини этэринэн, дойдуга ОӨ уобалаһыгар балачча сайдыы көстөр, онно үрдүк таһымҥа болҕомто көмөлөһөр. Соторутааҕыта Сбер уонна бырабыыталыстыба тэрийбит Ai Journey кэмпириэнсийэтин түмүгүнэн Россия президенэ Владимир Путин сорудахтарын испииһэгэ тахсыбыта. Бу былаан чэрчитинэн быйыл от ыйын 1 күнүгэр диэри оҥоһуу өй сайдыытын тосхоло бигэргэтиллиэҕэ.
Ол эрээри Саха сирэ бу дьайыылар федеральнай таһымҥа толору олоххо киирэллэрин кэтэһэр санаата суох. Айсен Николаев эппитин курдук, өрөспүүбүлүкэ бу эйгэҕэ бэйэтин лидерскай позицияларын бөҕөргөтүүгэ номнуо үлэлии сылдьар. «Оҥоһуу өйү туһаныыны кытта сибээстээх оҥоһуулар ахсааннарынан уонна хаачыстыбаларынан Саха сирэ бүгүн дойду биир лидера буолар. < … > Биһиги бу позицияны оннунан хаалларар туһугар көхтөөхтүк инники барыахха наада диэн быһаарыыны ылынныбыт», — диэтэ Николаев.
Саха сиригэр оҥоһуу өй араас эйгэлэргэ туттуллар, диэтэ регион баһылыга. Улахан суолталаах бырайыактар ортолоругар саха тылын сайыннарыыны, бибилэтиэкэ систиэмэтин сайыннарыыны, ойуур баһаарын мониторингын, медицинскэй көҕүлээһиннэри, чуолаан «Сайберия» хампаанньа үлэтин, ону тэҥэ дойдуга бастыҥ региональнай сайдыынан билиниллибит «Киберзащитник» бородууксуйаны бэлиэтээтэ.
