Спутнигы көтүтүү 12:16 чааска буолла. Үрдүгэ 30 километр, түһэр миэстэтэ — Мэҥэ Хаҥалас оройуона.
«Кансат» спутникка хаартыскаҕа түһэрэр камера, Гейгер счетчига, инфракраснай датчиктар, спектральнай анаалыс аппаратуурата, салгын хаачыстыбатын датчига баар. Көтүү дааннайдара кыра космическай аппарааттары көтүтүүгэ туттуллуохтара.
Хаартыска: Наука дьоҕус академиятын пресс-сулууспата
«Кансат» спутнигы оҥорууга наука дьоҕус академиятын преподавателлэрэ Тимур Илларионов уонна Артем Мардин, Красноярскайтан Решетнев аатынан Сибиирдээҕи судаарыстыбаннай университет исписэлиистэрэ, Дмитрий Зуев салайааччылаах, кыттыыны ыллылар. Академия космическай бырайыактарга салайааччыта Андрей Петров дистанционнай киэбинэн үлэлээтэ.
Стратостат ыытыытын Москваттан «Стратонавтика» ХЭУо салайааччыта Денис Ефремов ыытта. Кини 20-тэн тахса сыл аэрокосмическай бырайыактарынан дьарыктанар.
Академия ректора Василий Павлов эппитинэн, «КосмоМАНиЯ» бырайыактыыр смена төрдүс төгүлүн ыытыллар, ол иһигэр быйыл иккитэ ситиһиилээх көтүү оҥоһулунна.
