Саха сирин судаарыстыбаннай Мунньаҕар (Ил Тумэн) 2025 сыл 9 ыйынааҕы өрөспүүбүлүкэ социальнай-экономическай сайдыытын түмүктэрин уонна регион сүрүн үбүн докумуонун – бюджетын толоруутун көрүллэр киэҥ ыҥырыылаах мунньах буолла. Дьүүллэһиигэ регион бырабыыталыстыбатын бэрэссэдээтэлэ Кирилл Бычков, депутаттар уонна ситэриилээх былаас органнарын бэрэстэбиитэллэрэ кытыннылар. Ол туһунан www.sakha.gov.ru саайт суруйар.
Кирилл Бычков дохуот сүнньүн алмаас, нефть, көмүс хостуур уонна чох эйгэтигэр үлэлиир тэрилтэлэр оҥороллорун бэлиэтээтэ. Бу хайысхаларынан быйылгы сылга нолуок киириитин былаанын ситэтэ суох толоруу күүтүллэр. Ол аан дойду сыаната халбаҥнааһынын, тас ырыынактарга дьайар хааччахтааһыннары, ороскуоту үрдэтиини уонна солкуобайы бөҕөргөтүүнү кытта сибээстээх.
Кирилл Бычков алмаас ырыынагар балаһыанньа чэпчэки буолбатаҕын бэлиэтээтэ. Киириилэр сүрүн намтааһыннара дохуот нолуогар уонна дивиденнэргэ көстөр, онуоха атын нолуоктарга былааннаах көрдөрүүлэр сыл бүтүүтүгэр туолуохтара. Чох салаатыгар аан дойдуга сыана намтаабытыттан уонна валюта курсун сабыдыалыттан киирии аҕыйаабыта эмиэ бэлиэтэнэр.
«Төһө да аан дойду ырыынагар тас хааччахтааһын, халбаҥнааһын усулуобуйатыгар өрөспүүбүлүкэ кэскиллээх сайдыыны тутуһар. Эбиллиини үөскэтиигэ хостуур уонна энергетическэй эйгэлэргэ саҥа инвестиционнай бырайыактара сабыдыаллыыллар. Дьиэ-уот, инфраструктура тутуутугар баар көхтөөх таһымы тутар кыаллар», — диэтэ Кирилл Бычков.
Бырабыыталыстыба бэрэссэдээтэлэ өрөспүүбүлүкэ олохтоохторун иннигэр бары социальнай эбэһээтэлистибэлэри толору уонна кэмигэр толоруу инники күөҥҥэ хаалар диэн тоһоҕолоон бэлиэтээтэ.
Мунньах кэмигэр депутаттар судаарыстыбаннай бырагыыраамалары толорууга, инфраструктураны тутууга уонна сайыннарыыга, үбү-харчыны туһаныы көдьүүһүгэр уонна тутаах тэрилтэлэр туруктарыгар сыһыаннаах боппуруостары көтөхтүлэр. Ордук болҕомто муниципальнай тэриллиилэри өйүүргэ, субсидияны аһаҕастык тыырыыга, тутууга, доруобуйа харыстабылыгар уонна үөрэҕириигэ бырагыраамалар ситиһиилээх түмүктэригэр уурулунна.
«Биһиги экономика бары сүрүн хайысхаларын өйүүбүт уонна билиҥҥи приоритеттарга олоҕуран балысхан быһаарыылары буларга кыһанабыт. Чуолаан, үбү-харчыны чахчы наадалаах, дьоҥҥо саамай улахан туһаны аҕалар хайысхаларга ыытар туһугар хаттаан үлэни ыытабыт. Бу нэһилиэнньэни эминэн-томунан хааччыйыыга, санитарнай авиацияны сайыннарыыга, регион иһигэр уонна улуустар икки ардыларыгар авиарейтары субсидиялааһыҥҥа, ону тэҥэ автобус сырыытын өйөөһүҥҥэ сыһыаннаах. Бу дьаһаллар тырааныспар уонна медица тиһиги өйүүргэ көмөлөһөллөр уонна ыраах сирдэр олохтоохторугар социальнай өҥөнү ыытыыны үрдэтэллэр», — диэн бэлиэтээтэ Кирилл Бычков.
