Балаҕан ыйын 1 күнүттэн Саха сиригэр оҕолорго өрөспүүбүлүкэ историятыгар саҥа анал кууруһу үөрэтиэхтэрэ. Төрөөбүт дойдуну үөрэтэр учебниктары олохтоох преподавателлэр оҥордулар. Куурус Россия историятын саҥардыллыбыт бырагырааматын чэрчитинэн оскуола оҕолоругар бэһис кылаастан сэттис кылааска диэри үөрэтиллиэхтэрэ. Бу туһунан «Актуальнай интервью» биэриигэ Саха сирин үөрэҕин уонна наукатын миниистирин бастакы солбуйааччы Ньургун Павлов кэпсээтэ.
«Бу үөрэх дьылыттан бэһис, алтыс уонна сэттис кылаастар үөрэнээччилэригэр Россия историятыгар саҥа учебник киллэриллиэҕэ. Өрөспүүбүлүкэ оҕолоругар Саха сирин историятыгар анал куурус киллэриллиэҕэ. Учебниктары ХИФУ сэттэ преподавателэ, гуманитарнай чинчийии институтун, үөрэҕи сайыннарыы уонна идэни үрдэтии институтун уонна оскуола учууталлара ааптардар уонна оҥорооччулар буоллулар. Педагогтары Россия үөрэҕин министиэристибэтэ бигэргэппитэ. Учебниктары оҥоруу ааспыт үөрэх дьылыгар ыытыллан, билигин түмүктэнэр. Анал куурус өрөспүүбүлүкэ билиҥҥи күннэргэ диэри историятын хабар», — диэн Павлов иһитиннэрдэ.
Спикер бэлиэтээбитинэн, быйыл бырагырааматтан бэһис — сэттис кылаастарга обществознание суох буолар. Бу предмети үөрэтии ахсыс кылаастан киириэҕэ.
Үөрэх тиһигэр ити уонна да атын тирээн турар суолталаах боппуруостары педагогическай уопсастыбаннас атырдьах ыйынааҕы үгэс буолбут сүбэ мунньаҕын пленарнай мунньаҕар дьүүллэһиэҕэ.
Семинардар уонна стратегическай сессиялар атырдьах ыйын 19 күнүттэн саҕаламмыттара. Тэрээһин биэс трегынан ыытыллар:
“Үөрэхтээһин тирээн турар суолталаах боппуруостара » — инновационнай бырагыраамалар, үөрэтии методикалара, кадрынан хааччыйыы уонна наставничество.
“Үөрэхтээһин уонна дьиэ кэргэн » — оҕолору патриотизм, култуураны, үгэстэри ытыктааһын тыыныгар иитии, дьиэ кэргэн сыаннастарын бөҕөргөтүү.
«Үөрэх уонна технология» — үөрэх процеһыгар аныгы цифровой инструменнары уонна технологиялары туһаныы.
“Үөрэх уонна производство » — оскуола оҕолорун уонна устудьуоннары кэскиллээх идэҕэ бэлэмнээһин, өрөспүүбүлүкэ тэрилтэлэрин кытта бииргэ үлэлииргэ карьера траекторияларын үөскэтии.
“Үөрэх уонна наука » — үөрэнээччилэр чинчийэр, бырайыактыыр үлэлэрин сайыннарыы.
