Саха сирин оройуоннарын икки ардыларыгар көтүүлэр салҕаныахтара. Саха сирин бырабыыталыстыбатын үп-экономическай блога социальнай суолталаах ис авиа-көтүүлэргэ үп көрдүүр. Ону тэҥэ тырааныспар министиэристибэтэ экономическай өттүнэн олоҕурбут тарыыптан 20%-тэн 40%- ҥа диэри чэпчэтиилээх көтөр схеманы оҥордо. Тарыып муниципалитет баһылыктарыттан киирбит сайабылыанньаларынан үлэлиир. Ол туһунан ЯСИА –ҕа тырааныспар миниистирэ Владимир Сивцев эттэ.
«Социальнай суолталаах улуустар икки ардыларынааҕы көтүүнү олоххо киллэрии балаһыанньатыгар, авиа-көтүүлэр сыллааҕы былааннара 900-тэн тахсатын бэлиэтиибит. Ол эрээри бюджет хааччыллыылаах усулуобуйатыгар үп-харчы ордук приоритетнай хайысхаларга -социальнай төлөбүрдэргэ, ОДЬКХ уонна да атын олох-дьаһах хааччыйар хайысхаларыгар туһуламмыта. Көтөргө 556 мөлүйүөн солкуобайтан 85-һэ көрүллүбүт. Ол үп бэс ыйыгар туттуллан бүтэр, ити эрээри авиахампаанньалар субсидиялаах тарыыптарынан таһыыны ыыта олорбуттара», — диэтэ.
Миниистир Саха сирин баһылыга бырабыыталыстыбаҕа салгыы көтүүгэ үп көрдүүргэ сорудах биэрбитин иһитиннэрдэ.
«Үп-экономическай блок бу боппуруоһунан дьарыктанар. Маны тэҥэ “Полярные авиалинии” рейстэри салҕыыр, ол эбэтэр улуустар тырааныспарга хааччахтаналларын туһунан этиллибэт. Ону тэҥэ биһиги министиэристибэбит таһымыгар авиахампаанньалары уонна муниципальнай тэриллиилэри түмэр оперативнай штаб үлэлиир, онно чэпчэтиилээх таһыы туһунан кэпсэтии ыытыллар», — диэн Владимир Сивцев иһитиннэрдэ.
Билигин улуустар олохтоохторугар экономическай өттүнэн олоҕурбут тарыыптарга 20%-н чэпчэтиини 100-тэн 200 килэмиэтиргэ көтүүгэ, уонна 40%-н чэпчэтиини 200 килэмиэтиртэн ыраахха көтүүгэ ылар кыахтаахтар.
«Чэпчэтиилэр пассажир социальнай туругуттан тутулуга суох үлэлииллэр уонна бүтүн рейска тарҕаналлар. Бары тарыыптар муниципальнай тэриллиилэр баһылыктарыгар тиэрдилиннилэр. Муниципальнай тэриллиилэр сайабылыанньаларын урукку курдук туспа маршрутунан чопчу үлэлэтэллэр», — диэн миниистир бэлиэтээтэ.
Маннык схеманан Үөһээ Бүлүү оройуонун Туобуйа сэлиэнньэтигэр рейс, ону тэҥэ Өлөөн уонна Анаабыр улуустарыгар көтүү оҥоһулунна. Чугастааҕы күннэргэ Булуҥ уонна Аллараа Халыма оройуоннарыттан сайаапка ылара былааннанар.
Эрдэ Саха сирин баһылыга Айсен Николаев «Быһа холбонуутугар» өрөспүүбүлүкэ хотугу оройуоннарыгар диэри авиабилиэттэри субсидиялааһын балаһыанньатын быһаарбыта. Саха сирин олохтоохторо сыл бүтүөр диэри субсидиялаах билиэт атыыга суох буоллаҕына, куоратан дьиэлэригэр хайдах төннөрүөхтэрин туһунан ыйытыыга Айсен Николаев маннык кыһалҕа баарыгар сөбүлэспитэ.
«Дьокуускайтан оройуоннарга уонна улуус иһинээҕи рейстэргэ субсидиялаах билиэттэр быстах кэмҥэ тиийбэттэр. Быйылгы бюджекка ууруллубут үп-харчы бүппүтэ. Хомойуох иһин, бырабыыталыстыба бу боппуруоска кэмигэр быһаарыыны ылымматаҕа», — диэн бэлиэтээтэ.
Өрөспүүбүлүкэ баһылыга хотугу оройуоннар олохтоохторугар авиа-айаннар социальнай суолталаахтарын тоһоҕолоон бэлиэтээтэ, үгүстэргэ бу соҕотох айанныыр ньыма буоларын бэлиэтээтэ. “Дьону өйүөхтээхпит диэн өйдөбүллээхпит, онон субсидияламмыт рейстэр сөргүтүллэллэрин туһугар үп-харчы буларга бырабыыталыстыба бэрэссэдээтэлигэр сорудах биэрбитим», — диэтэ Айсен Николаев.
