Саха сирин чэпчэки, ювелирнай уонна ойууру переработкалыыр промышленноһын тэрилтэлэрэ 2026 сылтан баайга-дуолга нолуок төлөбүрүттэн босхолоннулар.
Өрөспүүбүлүкэ бырамыысыланнаска министиэристибэтин көҕүлээһинэ регион баһылыга Айсен Николаев өйөбүлүнэн Саха сирин судаарыстыбаннай Мунньаҕын (Ил Түмэн) XV мунньаҕар ылылынна.
«Экономика уонна санкционнай хааччах билиҥҥи кэмигэр олохтоох бизнес ордук өйөбүлгэ наадыйар. 2026 сылтан баайга- дуолга нолуок төлөбүрүттэн босхолонуу олохтоох оҥорон таһаарааччыларга тэрил, матырыйаал атыылаһыыга, станоктары өрөмүөннээһиҥҥэ үбү-харчыны ыытарга, онон переработкалыыр салаа производственнай көрдөрүүлэрин, ол аата үлэ миэстэтин оннунан хаалларарга уонна үрдэтэргэ көмөлөһүөҕэ», — диэн Саха сирин бырамыысыланнаска уонна геологиятыгар миниистирэ Максим Терещенко кэпсээтэ.
Бүтэһиктээх ааҕыыга көннөрүүлэр нолуок бэлиитикэтин туһунан регионнааҕы сокуоҥҥа киллэрилиннэ.
