Покровскайдааҕы 3 № — дээх орто оскуола үрдүкү кылаастара Артур Тихонов уонна Екатерина Соловьева Москваҕа буолбут «Россия Национальнай баайа» диэн үөрэнээччилэр XX Бүтүн Россиятааҕы кэмпириэнсийэлэригэр үрдүк көрдөрүүлэннилэр. Бу туһунан Хаҥалас үөрэх управлениетын пресс-сулууспатыгар иһитиннэрдилэр.
9 «В» кылаас үөрэнээччитэ Артур Тихонов «Педагогика, психология» секцияҕа лауреат буолла. Уолу уонна кини настаабынньыга Александра Чемпосованы үрүҥ көмүс, кыһыл көмүс бэлиэлэринэн наҕараадалаатылар.
Екатерина Соловьева 9 “А” кылаастан “Литературоведение, литературное творчество” хайысхаҕа II истиэпэннээх дипломант буолла. Соловьева билимҥэ салайааччыта Виктория Готовцева кэмпириэнсийэ чэрчитинэн Бүтүн Россиятааҕы «2026-Россия норуоттарын сомоҕолоһууларын сыла» педагогическай форум-методическай сэминээргэ тыл эттэ. Кини «Инвариантные модули в профессиональном самоопределении учащихся» диэн тиэмэҕэ дакылаат оҥордо.
Санатан эттэххэ, өрөспүүбүлүкэтээҕи В.П. Ларионов аатынан эдэр чинчийээччилэр «Инникигэ хардыы» научнай кэмпириэнсийэ-куоҥкурустарыгар регион түһүмэҕэр Артур Тихонов уонна Екатерина Соловьева эмиэ бириистээх миэстэлэри ылбыттара. Артур «Медиапритяжение школьников через адаптированную программу медиацентра “ОКО”» диэн чинчийэр үлэтин билиһиннэрбитэ уонна I истиэпэннээх дипломант буолбута. Екатерина II истиэпэннээх диплому «Образ ямского тракта в очерке А.П. Чехова «Из Сибири» чинчийбитин иһин ылбыта.
