Алтынньы 22 күнүгэр Саха сирин парламеныгар «Саха Өрөспүүбүлүкэтин Конституциятыгар (Сүрүн Сокуонугар) уларытыылары уонна эбиилэри киллэрии туһунан» конституционнай сокуон бырайыага бүтэһиктээхтик ааҕыллан ылылынна, ол иһигэр Саха сирин баһылыгын туспа боломуочуйаларыгар уонна РФ президенэ өрөспүүбүлүкэ баһылыгын эбээһинэһин быстах кэмҥэ толорооччу анаабыт правовой статуһугар сыһыаннаах көннөрүүлэр ылылыннылар.
Ол курдук, Саха сирин Конституциятын 72-с ыстатыйатыгар уларытыылар киирдилэр, ол быһыытынан Саха сирин баһылыга сыаннастар харыстабыларын хааччыйар, сыаналаах металлар уонна күндү таастар судаарыстыбаннай пуондаларын үөскэтиини уонна туһаныыны хааччыйар, Саха Өрөспүүбүлүкэтин күндү металларын уонна күндү таастарын судаарыстыбаннай пуондатыттан олоххо киллэрии туһунан быһаарыылары ылынар.
«Бүгүн хайыы-үйэ де факто баарыгар сөп түбэһиннэрэбит. Федеральнай сокуон быһыытынан Саха сирин баһылыга хас да сыл маннык боломуочуйалаах. Итиэннэ Судаарыстыбаннай пуондаҕа атыылааһын барыта Саха Өрөспүүбүлүкэтин судаарыстыбаннай бюджетын нөҥүө ыытыллар», — диэн регион баһылыга Айсен Николаев тоһоҕолоон бэлиэтээтэ.
Онон көрүллэр сүрүн сокуоҥҥа уларытыылар баар дьиҥнэри аҕалар сыалтан эрэ киллэриллибиттэр, онуоха бюджет сокуонун нуормаларыгар сөп түбэһиннэрэн, күндү металлары уонна күндү тааһы атыылааһынтан ылыллыбыт үп барыта Саха сирин судаарыстыбаннай бюджетыгар толору кээмэйинэн киирэр.
Ону таһынан Саха сирин Конституциятын 76-с ыстатыйатыгар өрөспүүбүлүкэ баһылыгын эбээһинэһин быстах кэмҥэ толорооччуга бобуулар испииһэктэрэ эмиэ чуолкайданар, бырабыыталыстыбаны тарҕатыыга федеральнай таһымҥа олохтоммут бобуу чааһа эмиэ киирэр.
Дьүүллэһии кэнниттэн өрөспүүбүлүкэ народнай депутаттара «Саха Өрөспүүбүлүкэтин Конституциятыгар (Сүрүн Сокуонугар) уларытыылары, эбиилэри киллэрии туһунан» конституционнай сокуон бырайыагын бүтэһиктээх ааҕыыга ылыннылар.
